Nýggj og kend andlit tá yngru hvirlurnar vístu síni kynstur

Tað er ikki uttan kensluna av stoltleika at man stóð á Tórsbreyt og hugdi at, hvussu yngru hvirlurnar hugnaðu sær á Tórsbreyt tá fyrsta umfar av Grandi Prix á breyt varð fyriskipa í dag. Tey kempaðu – og fingu nógv góð úrslit fyri innsatsin.

Dreingir yngri enn 7 ár

Har er tilboð um eina kapping til tey allar yngstu, og hesaferð var bóltkast á skránni. Derek Rasmussen hevði avgjørt at royna sína fyrstu kapping, og tað gekk væl. Hann legði út við at kasta 145 g tunga bóltin út á 4,38 m. Næsta lendi heilt úti á 6,16, meðan tað síðst miseydnaðist.

Derek ger seg kláran at kasta

Gentur 10-11 ár

Mia Ásadóttir valdi at royna seg bæði á 100 m teininum og í longdarlop. Fyrst var 100 m á skránni. Tá skotið fór leyp hon av stað, og var hon skjótt upp at renna sítt allar besta. Hon kempaði allan vegin og á málinum segði tíðin 18,99 sek (w: -0,8 m/s).

Mia leypir longdarlop

Mia fór síðan beina leið til longdarlop, har heilar 13 skuldu kappast. Hetta ávirkar kappingina rættuliga nógv, tí tað gongur long tíð millum lopini og tað ger tað ikki lættari, tá man stendur og bíðar í kalda vindinum. Mia legði út við at leypa 2,91 m. Næstu royndurnar vóru góðar, men ikki heilt so langar sum tann fyrsta, sum tískil bleiv tað besta hesaferð.

Dreingir 10-11 ár

Hjá teimum 10-11 ára gomlu dreingjunum vóru tað heilar  seks hvirlur, sum høvdu boðað frá luttøku. Fyrsta greinin var 100 m. Nógvu luttakararnir gjørdu at kappast var í tveimum riðlum. Jóhan Waagstein og Tóki Bárðarson Dahl vóru í fyrra riðlinum. Teir sprungu avstað tá skotið fór og beian vegin vóru teir millum teir fremru, har teir kappaðust allan vegin. Tóki var fyrstur við tíðini 16,33 sek (w: -1,5 m/s), sum er 0,53 sek skjótari enn hann hevur runnið teinin áður. Jóhan kom á mál á triðja plássi við tíðini 17,01 sek, sum er 2,05 sek skjótari enn hann hevur runnið teinin áður. Pætur Krosstein, Christian Dal Christiansen, Domenik Rasmussen og Rói Thomassen royndu seg í næsta riðli. Her komu allir væl avstað tá skotið fór og stuttligt var at síggja teir kempa allan vegin. Pætur kom næstur á mál við tíðini 17,22 sek (w: -0,8 m/s), meðan Christian gjørdist nummar 4 við tíðini 17,59 og Rói nummar fimm við tíðini 18,27 sek, sum er 0,51 sek skjótari enn hann hevur runnið teinin áður. Domenik kom á mál sum nummar seks við tíðini 19,46 sek í síni fyrstu kapping á Tórsbreyt nakrantíð.

Fyrri riðil er farin avstað við Jóhan og Tóka í miðjuni

So var longdarlop á skránni, og her vóru allir fimm aftur til dystin fús. Jóhan legði út við at leypa 3,13 m, sum er 8 cm longri enn hann hevur lopið áður. Pætur leyp neyvt somu longd í síni fyrstu kapping, meðan Rói legði 12 cm omaná sítt persónliga met við at leypa 2,86 m. Christian var beint aftanfyri við 2,74 m, sum er 1,74 m longri, enn hann hevur lopið áður, meðan Tóki legði út við at leypa 2,68 m í síni fyrstu kapping. Pætur legði 16 cm afturat í øðrum lopið og Christian legði 14 cm afturat. Í síðsta umfarið leyp Pætur heilt út á 3,47 m og tryggjað sær fyrsta pláss í spennandi kappingini, meðan Jóhan kom heilt út á 3,33 m og legði harvið tilsamans 28 cm afturat sínum persónliga metið. Hetta rakk til eitt triðja pláss samanlagt. Christian kom eisini á fyrsta sinnið útum 3 m strikuna við 3,11 m í síðsta lopið, sum rakk til eitt fjórða pláss. Rói var líka við eisini, at koma útum 3 m strikuna tá hann í síðsta umfarið leyp 2,93 m og harvið legði tilsamans 19 cm afturat sínum persónliga metið.

Pætur
Tóki
Rói

Jóhan, Christian og Rói royndu seg síðan við 145 g tungu bóltunum. Her legði Jóhan út við at kasta heilar 25,27 m, meðan Christian kom út á 20,27 m. Fyrsta kasti hjá Róa miseydnaðist. Í Næsta umfarið sat tað hjá Jóhan, sum kom heilt út á 34,17 m. Rói fekk tað at rigga og kom heilt út á 24,65 m, sum er næstan 5 metrar longri enn hansara gamla persónliga met. Í síðsta umfarið kom Christian heilt út á 28,80 m og legði seg á fjórða pláss, eitt pláss frammanfyri Róa á fimta pláss, meðan Jóhan endaði sum nummar tvey.

Jóhan

Tá skotið fór á 600 m teininum, sum er 1½ umgangur á Tórsbreyt var Christian aftur til dystin fús. Hann legði hart út í síni fyrstu roynd á hesum teininum, fyri síðan at leggja seg á eitt meir javnt tempo restina av teininum. Á málinum segði klokkan 2 min 33,83 sek, sum rakk til eitt fjórða pláss.

Christian

Gentur 12-13 ár

Elena Ellindsdóttir Olsen, Bjalla Beintudóttir Dalsgarð og Sólja Rye stóðu klárar tá starturin fór á 100 m. Elena kom avstað millum tær fremru og bardist um fremstu plássini allan vegin, og endaði hon, at ogna sær annað pláss við tíðini 15,48 sek. Harvið hevur hon higartil í ár bøtt um sítt persónliga met við heili 1,85 sek. Bjalla og Sólja royndu seg á fyrsta sinnið á 100 m teininum, men tað sá ikki út til at nerva tær. Tær ruku avstað saman við Elenu og hinum og kempaðu allan vegin til málstrikuna, har Bjalla fekk tíðina 17,92 sek og Sólja 20,23 sek, sum rakk til ávikavist 5. og 6. pláss.

Bjalla, Elena og Sólja

Bjalla helt síðan leiðina fram til diskuskast, har hon aftur skuldi royna seg á fyrsta sinnið. Longu í fyrsta kastinum kom Bjalla heilt út á 12,01 m. Í royndini at koma enn longur, koyrdi hon alt í næstu tvey kastini, men hesaferð vildi tað ikki sita. Hon endaði sostatt við 12,01 m, sum rakk til eitt annað pláss.

Bjalla

So var trýstøkk á skránni, og her vóru allar tríggjar við aftur. Elena legði seg á triðja pláss, eftir at hon í fyrsta umfarið leyp 8,03 m, sum er 95 cm longri enn hon hevur lopið áður. Bjalla leyp 6,48 m meðan lopið hjá Sólju miseydnaðist. Í øðrum umfarið økti Bjalla til 6,72 m, meðan Sólja kom út á 5,51 m. Bjalla økti aftur í triðja, hesaferð til 6,99 m, meðan Elena, sum undan triðja umfarið enn lá á einum triðja plássi økti til 8,21 m, og tók harvið fyrsta pláss í kappingini.

Sólja

Síðsta kappingin var 600 m, og her var Elena aftur klár. Hon plagar at standa seg væl í miðteinarenning, og so var aftur hesaferð. Hon legði beinan vegin sjógv millum seg og hinar, og her økti hon allan vegin. Á málinum segði klokkan 2 min 01,59 sek, sum er smá 3 sek skjótari enn hon hevur runnið teinin áður.

Elena

Dreingir 12-13 ár

Terji Dal Christiansen, Jógvan Ingi Falkvard Joensen og Baldur Báruson Persson stóðu allir klárir á startinum, tá skotið fór til 100 m kappingina. Hjá Terja og Baldur var hetta fyrstu ferð teir royndu seg á hesum teininum. Teir kempaðu tó allir væl, og komu á mál við tíðunum 17,30 sek (Terji), 18,17 sek (Jógvan Ingi) og 22,21 sek (Baldur). Hetta rakk til ávikavist 3., 4. og 5. Pláss. Tíðin hjá Jógvan Inga var 2,40 sek skjótari enn hann heur runnið teinin áður.

Terji, Jógvan Ingi og Baldur

So gekk leiðin til diskuskast har allir tríggir aftur vóru klárir til at royna seg í hesi grein á fyrsta sinni. Terji legði út við at kasta 17,04 m, meðan Baldur kom út á 10,53 m og Jógvan Ingi kom út á 9,93 m. Terji økti í øðrum umfarið til 17,67 m og Jógvan Ingi økti til 14,66 m. Annað kast hjá Baldur miseydnaðist. Ongin kom longur út í triðja umfarið og sostatt endaði Terji sum nr 1, Jógvan Ingi sum nr 2 og Baldur sum nr 5.

Baldur royndi seg eisini í trýstøkk, sum er grein hann enn ikki hevur roynt, heldur ikki til venjing. Hann vísti tó at hann hevði grund-teknikkin uppá pláss, men hesaferð fekk hann ikki heildina at sita og fekk tí onki lop máta.

Baldur

Síðsta greinin var 600 m, har Terji aftur var klárur. Hann legði hart út, fyri síðan av taka fótin eitt sindur av speedarnum, fyri at kunna halda støðugt tempo restina av teimum 600 m. Tíðin gjørdist 2 min 26,12 sek, sum er 14 sek skjótari enn hann hevur runnið teinin áður.

Terji

Næsta kapping verður 29. Mai, og vóna vit aftur at síggja nógvar Hvirlur vísa hvat tær duga, men inntil tá venja vit sum vant á Tórsbreyt.

1 gull, 2 silvur og 2 fjórða pláss annan dagin á DMU

Eisini annan dagin á DMU vístu ungu hvirlurnar, at tær teljast millum tey sterkastu innan sínar greinar í Danmark. Hesaferð gjørdist úrtøkan 1 gull, 2 silvur og 2 fjórða pláss í fimm kappingum.

Spjótkast (G18-19): Sunniva Bogadóttir – Danmarkmeistari

Finalan í spjótkast hjá gentunum byrjaði longu kl 09:10 um morgunin, sum er heldur óvanligt innan frælsu ítróttina. Sunniva, sum nýliga slerdi ein gamlan skaða í alboganum uppaftur, kastaði við einum skinnara, sum avmarkaði rørsluna í alboganum munandi. Hetta ávirkaði kasti, men støði hjá Sunnivu er so mikið høgt, at tá hon í fyrsta kasti gekk inn til næstsíðsta fet, og so tók impulsfetið dynamiskt, og kastaði 32,89 m, so var gullið longu tryggjað. Hon vildi tó meir, og tí setti hon meir ferð á atrenningina, men næsta kasti miseydnaðist heilt, meðan tað triðja aftur lendi um 32 m strikuna. Fjórða og síðsta miseydnaðist eisini. Sunniva tryggjaði sær tí gullmerkið góðar tveir metrar frammanfyri nummar tvey. Tað besta var tó at fáa staðfest at skinnarin loyvir Sunnivu at kasta spjót hóast skaða í arminum.

400 m rimarenning (D20-22): Dánjal Dahl Ljósheim – silvur

Meðan Sunniva kastaði spjót fór Dánjal í starblokkin at renna 400 m rimarenning bara 16 tímar eftir, at hann rann sær eitt broncumerkið á 400 m teininum. Dánjal hevur góða ferð, men enn hevur hann ikki vant nóg mikið av teknik til at renna um rimarnar og tí endar hann ofta við at leypa ov høgt, og harvið lenda ov tungt eftir hvørja rim. Hetta hendi aftur hesaferð, har hann hevði góða ferð millum rimarnar, men misti ov nógva ferð um hvørja rim. Góða ferðin gjørdi tó at hann ognaði sær eitt trygt silvurmerkið við tíðini 61,50 sek.

Hamarkast (G20-22): Guðrið Káradóttir Petersen – nr 4

Guðrið, sum nýliga bøtti um sítt føroyska met í hamarkast, hevði fingið hendurnar fullar, tí millum tær hon kastaði ímóti vóru bæði nummar eitt og tvey á DM fyri vaksin. Guðrið byrjaði við einum róligum kasti, sum lendi 38,51 m. í øðrum kasti royndi hon at fáa meir ferð inn í fyrsta umgang, hetta gav meir dynamik, men hon helt ímóti heldur enn at trýst hamaran, og tí miseydnaðist kasti. Í triðja kom hon betur eftir hamarnum, men hon gjørdi yvirtrakk. Í síðsta royndi hon aftur, men enn einaferð vildi teknikkurin ikki heilt. Hon endaði sostatt á 38,51 m sum rakk til eitt fjórða pláss, sum er tann placering hon var styrkismett til.

Longdarlop (D20-200): Tórur Mortensen – silvur

Tórur royndi seg í longdarlop, sum er grein har hann bara manglar 5 centimetrar at taka 20 ára gamalt føroyskt met. Hetta fór vantandi at vera ein sera spennandi finala við fýra monnum, sum hava lopið millum 7,14 og 6,93 m í ár. Kappingin gjørdista spennandi tí fleiri vístu, at teir kundu leypa langt. Tað var tó ongin sum heilt fekk tað góða lopið at sita. Í fyrstu tveimum lopunum sakk Tórur og misti harvið ferð inn móti plankanum. Í triðja fekk hann meir ferð við sær, men tað eydnaðist honum ikki at fáa nóg nógva hædd á lopið. Í síðsta sat ferðin, og hann fekk góða hædd á. Tíðanverri var tað yvirtrakk við lítlum centimetri. Hetta lopið var væl longri enn hini, men tað hjálpti ikki, og tí endaði Tórur á øðrum plássi við 6,83 m, 21 centimetrar frá gullinum, og 20 centimetrar frá bronsuni.

200 m (D16-17): Miso Buha – nr 4

Síðstur í eldin hesaferð var Miso, sum royndi seg á 200 m teininum, har hann var styrkismettur at enda nummar 5 og tí rann í a-finaluni. Miso hevur verðuliga fingið ferð á sprint eftir summarferiuna, og tí var spennandi um framgongdin fór at halda áfram. Tíðanverri, so miseydnaðist starturin hjá honum heilt, og var hann aftast av teimum seks í A-finaluni eftir fyrstu 50 metrarnar, men toppferðin er økt munandi og rann hann seg inn á eitt fjórða pláss. Tíðin gjørdist 23,61 sek, sum er 0,99 sek skjótari enn hann megnaði á DMU í 2019.

So er DMU av á hesum sinnið, og gjørdist endaliga úrslitið í 10 kappingum hjá Hvirluni: 3x gull, 2x silvur, 2x broncu, 2x nr 4 og 1x nr 8

Tvey gull og tvær broncu fyrra dagin á DMU

Ársins danska meistaraheitið fyri ung er á hugnaliga Skovdalen stadion í Aalborg. Har luttakaratalið var minka munandi, tí at marki fyri luttøku var sett til 6 í teknisku greinunum og 12 í rennigreinum. Harafturat byrjaði fyrri dagurin við áarføri. Hetta tyktist tó ikki darva ungu hvirlurnar, sum allar livdu upp til sína styrkismeting og í fleiri førum, komu enn longur fram á úrslitalistan.

Diskuskast (G 18-19 ár): Lýdia Poula Simonsen (danskur meistari)

Fyrst í eldin var Lýdia, sum kappaðist við 1,0 kg tunga diskinum, har hon var styrkismett nummar tvey góðar 4½ metrar frá gullinum. Umstøðurnar at kappast vóru stak vánaligar, tí tað regnaði nógv. Hetta ger tað nærum ógjørligt at fáa gott tak í kantin á diskinum. Kappingin byrjaði eisini við at tær flestu kastaðu uttanfyri ella í netið. Fyrsta kastið hjá Lýdiu nart eisini netið, men lendi tó innanfyri. Tað bleiv máta til 18,90 m. Sostatt var hon 13½ m aftanfyri fyrsta pláss eftir fyrsta umfarið. Næsta kasti sat betur, og kom hon út á 27,02 m. Nú restaðu bara góður 3 metrar í at náða fyrsta pláss. í fimta sat teknikkurin nærum perfekt. Tíðanverri rakti diskurin netið. Hon royndi so aftur í fjórða og síðsta umfarið, og aftur fekk hon gott trekk í diskin, men hæddin var ikki optimal. Kasti bleiv tó máta til 33,31 m, sum er 15 centimetrar frá hennara føroyska meti. Sostatt legði hon seg ein góðan metur framum nummar tvey. Hin royndi at svara aftur, men ikki rakk. Lýdia gjørdist sostatt danskur meistari í diskuskast G18-19 ár.

Kúlustoyt (G 18-19 ár): Lýdia Poula Simonsen (bronsuvinnari)

Ein tíma eftir at diskuskappingin var av, fór Lýdia í gongd við sína næstu kapping. Hesaferð skuldi hon royna seg við 4,0 kg tungu kúluni, har hon var styrkismett sum nummar 4. Her darvaði veðrið ikki líka nógv, men tað var tó við spenningi hon fór inn í kappingina, tí teknikkurin hevur ikki siti í ár, og í seinastuni hevur verði tungt at koma útum 10 m strikuna. Smávegis justeringar farnu viku, góðu tó vón um at tað fór at ganga betur. Lýdia legði eisini út við at stoyta kúluna út á 10,51 m, sum er væl betur enn hon hevur gjørt til venjing í seinastuni. Næstu tvey vóru eitt vet styttri, men tá hon í fjórða kom út á 10,55 m hevði hon tryggja sær broncumserkið.

Trýstøkk (D16-17 ár): Miso Buha (danskur meistari)

Miso byrjaði sína luttøku á DMU í síni ser-grein; Trýstøkk. Her var einasti spenningur um hvussu langt Miso mundi leypa, tí í styrkismetingini var hann so mikið langt fremst at har skuldi nógv til um hann skuldi koppast. Tá hann so leyp 12,98 m (w: 0,0 m/s) í fyrsta lopið, so var kappingin í verðuleikanum avgjørd. Har var stórur intensitetur í lopinum, men tekniskt sat tað ikki heilt. Í næsta umfari royndi hann at koma meir fram í fyrsta avsetti, men tað riggaði ikki, og lopið bleiv eitt sindur styttri. Tað fjórða miseydnaðist heilt. Í fimta var intensiteturin væl lægri, men nú sat tað tekniska, tað bleiv tó ikki longri enn tað fyrsta, og sostatt vann Miso eitt trygt gullmerkið har hansara stytsta lop var ½ m longri enn tað longsta hjá silvurvinnaranum.

100 m (D20-22 ár): Tórur Mortensen (nr 8)

Tórur er farin undir víðari lestur í Aarhus, og flutti tí fyrst í august til Aarhus at búgva. Hann er byrjaður at venja í felagnum Aarhus 1900, har venjarin hjá honum er danski landsliðsvenjarin í lop. Enn er venjingin tó ikki komin í fasta legu og tí er nakað av skarpheitini við at fara. Hann var tó til dystin fús tá skotið fór í einari sera sterkari kapping. Tekniskt var starturin á góðari leið, men Tórur var ov skjótur upp, og fór síðan í bakvekt í sprintinum. Hetta gjørdi tað trupult at halda ferðina. Á málinum segði tíðin tó 11,34 sek (w: 0,4 m/s). Hetta rakk til eitt áttanda pláss. tíðin er samstundis undir oyggjaleikakravið, og sostatt hevur Tórur higartil klára kravið á 100 m, 400 m og í longdarlop.

400 m (D20-22 ár): Dánjal Dahl Ljósheim (bronsumerki)

Siðstur í eldin var Dánjal, sum skuldi royna seg á 400 m. Dánjal fekk ein góðan start og hevði góða ferð eftir handaru langsíðuni. Harvið megnaði hann at halda tempo við honum, sum var styrkismettur nummar tvey, góð 2 sek skjótari enn Dánjal. Inn í næsta svingi fall tempo eitt vet, men Dánjal megnaði tó at halda stílin, og síðstu 100 metrarnar kempaði hann fyri ikki at fella saman og spenna upp. Hann var nakrar fáa metrar frá øðrum plássi allan vegin, men var ½ sek ov stuttur hesaferð. Hann ognaði sær sostatt eitt broncumerkið við tíðini 52,12 sek.

Annan dagin er skráðin (føroyska tíð)

  • Kl 08:10 spjótkast: Sunniva Bogadóttir (G18-19)
  • Kl 08:40 400 m rimarenning: Dánjal Dahl Ljósheim (D20-22)
  • Kl 10:00 Hamarkast: Guðrið Káradóttir Petersen (G20-22)
  • Kl 10:30 longdarlop: Tórur Mortensen (D20-22)
  • Kl 13:00 200 m: Miso Buha (D16-17)