Aftur í 2017 vann Hvirlan stóra FM (FM á breyt fyri vaksin). Í alt vann Hvirlan 14 av teimum 31 kappingunum, og átta ferðir vóru tað bara hvirlur á pallinum.

200 m, Kvinnur

Tað er í løtuni ein stór breidd í toppinum hjá kvinnunum her heima á 200 m teininum. Ein av teimum, sum er við í toppinum er Alda Sigursdóttir Lamhauge, sum aftur í ár hevur bøtt um øll síni persónligu met. Tað seinasta í gjár á 100 m. Í dag var so 200 m á skránni, har innleiðandi fyrst skuldi fáast av vegnum. Her er so at siga, at tað var ikki bara at fáa tað av vegnum, tí tær, ið ynsktu sær eitt pláss í finaluni noyddust at renna upp móti tí persónliga metinum hjá Aldu. Alda var í fyrra riðlinum, og her vísti hon sína sprint-styrki við at koma skjótast úr blokkinum, og helt hesa leiðslu úr svinginum, so var tað ein spurningur um at halda stílin, og tað gjørdi hon væl inntil 30 m vóru eftir, men tá var finaluplássi tryggja. Tíðin gjørdist 28,59 sek, sum er væl skjótari enn hon hevur runnið teinin áður.

Í finaluni var Alda aftur skjót úr blokkinum, og aftur var hon væl við eftir teir fyrstu 100 m. So bleiv tað ein harður dystur allan vegin á mál, har tríggjar stríddust um triðja plássi, beint aftanfyri tær báðar fremstu. Við tíðini 28,56 sek, endaði Alda við at renna enn skjótari enn innleiðandi, og rakk tað til eitt fjórða pláss bara 0,03 sek frá pallinum. Imponerandi at síggja Aldu renna tveir teir skjótastu 200 m hon hevur runnið við so stuttum millumbili.

200 m, Menn

Hjá monnunum royndu Tórur Mortensen og Magnus Dal-Christiansen seg. Magnus hevði yvirbelasta lyskuna í longdarlopið í gjár, og tí var tað ivasamt til tað síðsta um hann skuldi renna. Hann valdi tó at gera eina roynd. Tá starturin, eftir fleiri seinkingar, fór, var Tórur sum eitt skot úr blokkinum, og longu eftir fyrstu 10 metrarnar var hann væl fremri enn hinir. Magnus hinvegin, kendi beinan vegin at lyskan toldi ikki at hann pressaði, og setti ferðina niður, og rann róliga á mál. Eftir acceleratiónina fann Tórur rútmuna og rann lætt úr svinginum, har kendi hann, at tað byrjaði at spenna upp í øðrum lærinum, men við at avlasta og royna at renna lættan, megnaði hann at halda ferðina. Inn móti málinum var hann næstan 20 m frammanfyri nummar tvey. Tað var tí við spenningi at bíða var eftir tíðini, og ikki minst, hvat vind mátarin fór at siga. Tíðin gjørdist 22,72 sek, sum er heilar 0,28 sek skjótari enn føroyska metið. Tíðanverri var vindurin 0,7 m/s ov nógvur, og tí slapp metið at standa hesaferð. Tíðin hjá Magnus gjørdist 27,91 sek, sum er 3½ sek frá hansara persónliga metið, men bara gott sek frá broncumerkinum.

1500 m, Menn

Fyri Dánjal Dahl Ljósheim er primera málið danska meistaraheitið fyri ung komandi vikuskiftið, tí hevur hann vant hart alla vikuna, og tað sást at hann var slitin. Hann valdi tí at leggja varliga út á 1500 m. Hann helt ferðina væl, men tá 150 m vóru eftir valdi hann at gera eina roynd at heinta ein, ið lá 50 m frammanfyri. Spurturin var øgiligur, men Dánjal byrjaði eitt vet ov seint uppá spurtin, tí hann megnaði “bara” at heina 49 av teimum 50 m. Tað bleiv tó til eitt flott broncumerkið við tíðini 4 min 41,78 sek.

100 m rimarenning, Kvinnur

Í teknisku greinunum kemur tað meir enn so fyri, at bara Hvirlan er umboðað, og í rimarenning er langt síðan onnur enn Hvirlan royndu seg á FM. Ein orsøk er sjálvandi, at FÍF hevur niður raðfest hesa grein í mun til aðrar. Í ár var Edna Maria einsamøll tá starturin fór, men tað sigur onki um høga støði hon vísti, tí hon kom væl uppum fyrstu rim, og helt eina góða rútmu nærum allan vegin. Triðsíðstu rim rakti hon hart við knæðnum, og oyðilegði tað góðu rútmuna hjá henni. Hon rann tó á mál, og har vísti tað seg, at tað bara restaðu 0,2 sek í einum føroyskum metið.

3000 m forðarenning, Menn

Dánjal Dahl Ljósheim royndi seg eisini á 3000 m rimarenning. Hetta var fyrstu ferð hann skuldi royna seg í hesi grein, so tað var við spenningi at hann fór í gongd. Tað sást tó ikki at hetta var fyrstu ferð, tí hann kom lætt yvir forðingarnar, íroknað spektakuleru vatngryvjina. Longu á fyrsta umgangi legði hann seg á odda, og hann økti alla vegin. Endin var at hann vann ein tryggan sigur við tíðini 11 min 28,42 sek. Neyvt eitt minutt frammanfyri nummar tvey.

Trýstøkk, Kvinnur

Í  trýstøkk royndi Edna Maria seg. Edna Maria, hevur áður gjørt um seg í hesi grein, og er við at arbeiða seg upp aftur eftir longri steðg. Hon vísti í sínum lopum, at hon hevur kapacitet til at leypa langt, men hon fekk ikki lopini at sita hesaferð, men megnaði tó at leypa smáar 10 m. Við tað at úrslitalistarnir ikki eru tøkir, ber ikki til at greiða nærri frá hvussu langt hon leyp.

Trýstøkk, Menn

Tá Tórur Mortensen, sum hevur lopið omanfyri 15 m, ikki fekk lopið vegna skaðan, hann fekk á oyggjaleikunum, so gjørdist kapping sera opin, og her royndi Magnus Dal-Christiansen seg. Magnus venur ikki trýstøkk, og var dagsins kapping hansara fyrsta roynd í hesi grein síðan FM í 2016. Fyrstu lopini blivu nýtt til at fáa kensluna av atrenningini. Í fimta lopið byrjaði rútmukensla at koma, og í síðsta leyp hann so sítt longsta lop, sum bleiv mált til 10,30 m. Hetta rakk til silvurmerkið.

Spjótkast, Kvinnur

Kvinnurnar í Hvirluni eru við at flyta støði í spjótkast har tað er við at blíva ordiliga stuttligt, og tí var tað ikki minni stuttligt at síggja Maritu Káradóttir Petersen, sum hevur havt ein longri steðg í venjing, royna seg móti hinum evnaríku spjótkastarunum. Tað var tó Sunniva Bogadóttir, sum longu í fyrsta umfarið setti trumf á við at kasta 35,82 m, sum er longri enn oyggjaleikakravið, umframt at tað hevði rokki til eitt broncumerkið á Gotlandi. Marita, sum roynd seg í síni fyrstu kapping síðan hon vann FM í 2015, vísti at hon dugdi enn, tí øll hennara góðkendu kast vóru omanfyri 30 m. Tað longsta var 32,37 m, sum rakk til eitt trygt silvurmerkið. Guðrið Káradóttir Petersen vísti at hon ikki bara dugir hamarkast, tí longu í fyrsta umfarið økti hon um sítt persónliga met við 4 metrum, og legði seg á fjórða pláss. Hesa støðu helt hon til síðsta umfar, tá hon legði enn ein metur afturat sínum persónliga met, so tað nú er 27,00 m. Harvið tryggjaði hon sær broncumerkið. Helena Svabo Ziska vísti aftur hvussu nógv hon hevur tikið seg fram, tí hon bøtti í trimum umførum um sítt pesónliga met við tilsamans 5½ m, so tað nú er 21,15 m.

Spjótkast, Menn

Hjá monnunum var Helgi aftur við, og har sást beinan vegin at hann enn dugir at kasta, tí hóast hann ikki hevur vant síðan FM í 2015, so megnaði hann at kasta longri enn hann gjørdi tá. Tað longsta hjá honum gjørdist 42,50 m. Hetta rakk tó bara til silvurmerkið, tí Tórur Mortensen, vísti sítt fjølbroytni við at vinna spjótkast við einum kasti uppá 44,60 m. Á triðja plássi bøtti Magnus Dal-Christiansen um sítt persónliga met í fleiri umførum til hann í fjórða umfarið kastaði 39,02 m. Kristian Martin Garðalíð kastaði 23,89 m á fjórða plássi.

Kúlustoyt, Kvinnur

Edna Maria Debes, Helena Svabo Ziska, Guðrið Káradóttir Petersen og Sunniva Bogadóttir royndu seg allar við 4,0 kg tungu kúluni. Hetta endaði við at gerast ein tættur dystur, har dysturin um gullið ikki bleiv avgjørdur fyrr enn í allar síðsta stoyti. Tað var tá Sunniva kom út á 7,82 m. Harvið legði hon Ednu Mariu 5 cm afturum, við Guðrið 21 cm longri afturi, og síðan var einans ein metur til Helenu á fjórða plássi við 6,40 m. Sunniva, Helena og Guðrið bøttu allar munandi um síni persónligu met.

Kúlustoyt, Menn

Hjá monnunum royndu Kristian Martin Garðalíð, Helgi Geyti og Tórur Mortensen seg. Eins og hjá kvinnunum var tað ein tættur dystur millum allar, tí tá av tornaði var bara ein metur millum Tórur Mortensen á fyrsta plássi og Helga Geyti á triðja plássi. Hetta var fyrstu ferð Tórur royndi seg við 7,26 kg tungu kúluni, men her kom solidi grundformurin til sín rætt, tí hann kom heilt út á 9,52 m. Kristian Martin vísti at hann er stabilur við at stoyta 2 cm longri enn hann gjørdi á FM í 2016. Hansara longsta gjørdist 9,25 m. Helgi var bara ½ m frá sínum besta, tá hann í fimta umfarið uttan atrenning stoytti kúluna út á 8,47 m.

Fleiri myndir eru í myndasavninum

Fyrsti dagurin av ársins útgávu av stóra FM (FM á breyt fyri vaksin) var í dag á Tórsbreyt. Hóast onkur av stuðlunum manglaði, so var Hvirlan væl umboðað í flestu greinum. Úrtøkan gjørdist at sjey av teimum fimtan gullmerkjunum endaðu um hálsin á hvirlu-íðkarum.

100 m kvinnur

Á 100 m var Alda Sigurðsdóttir Lamhauge klár at royna seg á 100 m. Alda, sum í apríl setti sítt persónliga met undir perfektum umstøðum, men á Gotlandi vísti at har er meir at koma eftir. Í dag var høvi so har, at vísa hvat hon kundi, og tað gjørdi hon. Hon skuldi tó fyrst ígjøgnum innleiðandi, og har rann hon taktiskt, fyri at spara kreftir til finaluna.

Í finaluni fekk hon ein góðan start, og lá á odda eftir fyrstu 10 metrarnar, hesa leiðslu helt hon nærum allan vegin, men á málstrikuni fekk ein kroyst seg framvið. Tíðin hjá Aldu vísti tó, at hon hevði runnið stak væl, tí við 13,24 sek fyri teir 100 m í einum lítlum mótvidni, skar hon 0,06 sek av sínum persónliga met.

 

100 m menn

Hjá monnunum royndu Magnus Dal-Christiansen og Tórur Mortensen seg. Magnus er nýliga byrjaður at venja aftur eftir ein longri steðg, har hann fokuseraði uppá primer-ítróttin hjá sær Badminton, har hann umboðaðið Føroyar á oyggjaleikunum. Tórur, sum fekk ein skaða á oyggjaleikunum, hevur síðan fokuserað uppá sprint, so her var spennandi at vita, hvat fór at henda. Báðir vóru teir í sama innleiðandi riðli, og her runnu teir so mikið taktiskt at teir báðir vóru nærum 2 sek aftanfyri sínar bestu tíðir. Tað rakk tó til trygg pláss í finaluni. Tummas Napoleon Arge, sum eigur skjótastu tíð av teimum tilmeldaðu, rann seg eisini trygt í finaluna, men í upphitingini til finaluna gjørdi gamal skaði um seg, og tí valdi hann av geva avboð til finaluna.

Hóast starturin hjá Tórur ikki sat heilt, so var hann longu langt fremst eftir teir fyrstu 10 metrarnar, og hann økti allan vegin á mál. Tíðanverri uttan at verða pressaður, og gjørdi tað, at tíðin ikki gjørdist enn betur. Hann kom á mál við tíðini 11,45 sek, sum er 0,18 sek skjótari enn hann hevur runnið teinin áður, og nú eru onnur 0,18 sek til føroyska metið. Magnus fekk ein fyri hann óvanliga vánaligan start, men megnaði tó at verða við í dystinum um annað plássi. Manglandi venjingin síðstu mánaðirnar gjørdi tó, at hann misti ov nógva ferð síðstu 20 metrarnar, og endaði hann tí á triðja plássi, tó við einum persónligum metið, sum nú eitur 12,12 sek.

 

Longdarlop kvinnur

Hjá kvinnunum var Edna Maria Debes við. Edna Maria er við at koma í gongd við venjing eftir ein longri steðg, og tí er primera fokus við FM at koma í gongd við at kappast, soleiðis at hon er klár til komandi kappingarár. Edna Maria hevði góða ferð í atrenningini í fyrsta lopið, men hon fekk ikki timingina í avsettinum at rigga. Lopið bleiv tó mált til 4,33 m hóast ein mótvind uppá 1,5 m/s. Hetta var tað longsta lopið Edna Maria fekk góðkent, hon hevði tó eitt sera langt lop har bæði tempo og timing sat, tíðanverri var tað yvirtrak við 2 centimetrum. Tað er gott at síggja at tá tað riggar, so hevur hon tey heilt longu lopini í sær.

Longdarlop Menn

Hjá monnunum vóru Tórur og Magnus aftur klárir. Hjá báðum er hetta fyrsta kapping í longdarlopið hjá síðan stóra FM í 2016. Tórur, sum í vár hevur valt at skifta lop-bein, vísti at hann eisini dugir við hinu beininum, tí longu í fyrsta lopið leyp hann 5,93 m, sum var 30 cm longri enn tað longsta nakar annar kláraði á degnum. Hann steðgaði tó ikki har, tí í øðrum umfari legði hann 27 cm omaná, og vann harvið trygt eitt gullmerkið. Magnus hevur havt trupulleikar við lyskuni, og tí valdi hann at leypa við lægri ferð. Hann leyp tó væl og í øðrum umfarið leyp hann 4,92 m. Hann leyp eitt afturat, men valdi so at steðga fyri at umganga at irritera lyskuna ov nógv.

 

Diskuskast kvinnnur

Hvirlan hevur fingið ein sterkan og stak spennandi hóp av ungum kvinnum sum kasta. Tríggjar av hesum royndu seg í diskuskasti. Hetta vísti seg at blíva ein sera spennandi kapping, har einans 1½ metur skilti tær tríggjar til síðst. Sunniva legði seg á odda við 20,90 m i fyrsta umfarið, men Helena fór framvið í næsta umfarið, tá hon kastaði 22,68 m. Sunniva svaraði aftur beinan vegin við at bøta um sítt persónliga met til 23,30 m. Í fjórða kastaði Helena heilar 24,83 m. Beint eftir bøtti Guðrið um sítt persónliga met til 23,71 m, og legði seg á annað pláss. Í fimta umfarið rakti Guðrið diskin væl, og kom heilt út á 24,09 m. Hóast góðar royndir í síðsta umfarið, broyttist onki. So Helena fór heim við sínum fyrsta føroyameistaraheitið, Guðrið við silvurmerkinum og Sunniva við broncumerkinum. Fyrsti reint reyði pallur á degnum.

Diskuskast menn

Hjá monnunum var gott at síggja Helga Geyti aftur. Hetta var fyrsta kapping hjá Helga í tvey ár. Hann royndi seg móti Magnus Dal-Christiansen og Hera Ziska. Magnus og Helgi høvdu ein tættan dyst um silvurmerkini, har Helgi í fjórða umfarið tryggjaði sær silvurmerkið við einum kasti uppá 26,23 m, sum bara er 4½ m frá gamla persónliga metinum hjá honum. Tað longst hjá Magnus var 24,35 m, sum bara er nakrar centimetrar frá hansara persónliga metið. Heri vann gull við einum kasti uppá 34,75 m, og tryggjaði harvið enn ein reyðan pall.

Hamarkast kvinnur

Hjá kvinnunum var ikki tann stóri spenningurin um hvør fór við gullinum, tí Guðrið Káradóttir Petersen, hevur veruliga flutt seg í hesi grein. Longu í fyrsta umfarið bøtti hon um sítt persónliga met við góðum 14 m. í øðrum umfarið kastaði hon 33,25 m og legði enn ein metur afturat sínum persónliga metið. Dysturin um silvurmerkini gjørdist tættur millum Ednu Mariu Debes, sum vann gull í 2016 og Sunnivu Bogadóttir. Í hesum dystinum legði Edna Maria seg á odda í fyrsta umfarið við 18,37 m. Hon økti til 18,82 m í øðrum, men í triðja kastaði Sunniva 19,57 m, sum er persónligt met. Hon legði seg harvið á annað pláss. Ongar broytingar hendur síðstu trý umførini. Fjórða pláss ognaði Helena Svabo Ziska sær við einum persónligum metið uppá 16,50 m. Enn ein reyður pallur. 

Hamarkast Menn

Hjá monnunum var gott aftur at síggja bæði Bjarna Kárason Petersen og Helga Geyti. Hvørgin hevði kappast, ella vant í fleiri ár. Tað var tó eyðsýnt at teir enn vistu hvat ein skuldi, tí báðir kastaðu væl. Helgi var tó tann stinnari, sum við einum kasti uppá 28,35 m ognaði sær silvurmerkið. Hetta er bara góðan metur frá hansara persónliga metið. Bjarni kastaði 26,74 m og ognaði sær harvið broncumerkið. Heri Ziska vann við 38,14 m, og tryggjaði harvið fjórða reyða pallin á degnum.

4×100 m boðrenning, Kvinnur

Á hvirluliðnum vóru 2 kastarar, ein leypari og ein sprintari, so ikki kann sigast annað enn at hetta var eitt blanda lið. Tað var tó ikki so lætt at síggja at tað ikki vóru fýra sprintarar, tí tær vóru væl við allan vegin, og tá Alda Sigurðsdóttir Lamhauge fekk boðini í síðsta skiftið, var hon bara nakrar metrar aftanfyri nr 2. Hon rann seg væl fram, men tað manglaðu nakrir centimetrar á málinum. Tó eitt flott broncumerkið til Hvirluna.

 

4×100 m boðrenning, Menn

Hjá monnunum kom tað illa við at Tummas Napoleon, sum hevði skjótastu tíð av teimum tilmeldaðu á 100 m, fekk ein skaða, og eisini noyddist at geva avboð til boðrenningina. Hetta gjørdi at hvirlan noyddist út at leita eftir einum at renna fyrsta túr. Hesum møguleikanum tók Hans Sivertsen við. Hans kom væl avstað, og tá Magnus, sum næsti maður fór avstað, var hann á liðini av næsta manni. Hann legði seg á eitt fyrsta pláss, soleiðis at Rúni Jacobsen, kundi renna í frið. Rúni økti allan túrin, soleiðis at Tórur fekk ein reinan paradutúr móti endanum. Tíðin gjørdist 47,00 sek, sum er góðtikið, serliga havandi í huga at skjótasti maður ikki var við, og at skiftini vóru varin

 

Fleiri myndir koma í myndasavnið

Í ár var avgjørt at minka um greinaúrvalið á Jatnatøkum. Á skránni var mílin (1609 m), 1000 m boðrenning og fartelefonkast.

Fyrst á skrá var Mílin, og hjá kvinnunum stóðu tríggjar kvinnur klárar, og hóast talið kanska ikki8 tyktist stórt, so var kvaliteturin øgiligur, tí har vóru ikki minni ein tveir oyggjaleikaluttakarar; Rebekka Fuglø og Oddvør Josephsen. Afturat sær høvdu tær fingið Mariu Biskopstø. Allar umboðaður tær Treysti. Tað sást beinan vegin at Rebekka vildi nakað, tí longu eftir fyrstu 200 m var luft aftur til hinar báðar, og hon økti allan vegin á mál, har hon var 26 sekund frammanfyri nummar tvey. Meir týdningarmikið var tó at hon næstan níggju sekund skjótari enn føroyska metið á teininum. Nýggja føroyska metið er 5 min 02,56 sek. Dysturin um annaðplássi tyktist verða avgjørdur tá 200 m vóru eftir, men tá fór Oddvør undir ein ordans spurt, og tók so upp á liðina av Mariu, sum svarði aftur. Tær fylgdust um málstrikuna, tá bara 0,04 sek var millum tær. Maria ognaði sær annað plássi við 5 min 28,32 sek, meðan Oddvør kom á mál við tíðini 5 min 28,36 sek.

Hjá monnunum vóru fimm mans, umboðandi trý ymisk feløg, við. Tað sást frá byrjan at Julian Gregersen (Treysti) var í einum flokki fyri seg, tí hann økti frá byrjan og allan vegin á mál. Tíðin hjá honum gjørdist 4 min 42,38 sek. Dysturin um annað plássi tyktist verða avgjørdur tíðliga, tí Regin Thomsen (Roysnið) hevði lagt Dánjal Dahl Ljósheim (Hvirlan) langt afturum, men síðstu 200 m tók dánjal ein ordans sput, og endaði við at vinna trygt á Regin við tíðini 5 min 01,86 sek. Regin fekk tíðina 5 min 04,88 sek. Á fjórða plássi var ein debutantur á breytini. Tað var Hans A. Gregoriussen (Hvirlan), sum rann teinin uppá 5 min 40,60 sek. Veteranurin Guttorm Sørensen (Treysti) kom á mál við tíðini 6 min 04,55 sek.

Eftir faratelefon kast var avgreitt (meir kann lesast um tað her), fóru boðrenningarnar í gongd. 1000 m boðrenning er ein heldur óvanlig grein, har fyrsti persónur rennur 100 m, næsti 200 m, triði 300 m og síðsti rennur 400 m. Hjá monnunum var einans eitt lið. Hetta var eitt sera fjølbroytt lið, har Trygvi Laksáfoss, sum hevur tikið ein steðg í síni venjing meðan hann lesur í Danmark, var fyrsti maður. So rann Rúni Jacobsen, sum hevur verði skjótasti føroyingur seinnu árini, so Tórur Mortensen, sum er meir kendur sum trýstøkkari og at enda miðteinarennarin Dánjal Dahl Ljósheim. At renna einsamallur er ongantíð. Tíðin hjá teimum fýra gjørdist 2 min 17,88 sek.

Hjá kvinnunum vóru fýra lið. Eitt úr Treysti, eitt úr Bragdinum, eitt úr Hvirluni og so eitt blanda lið við umboðum úr Bragdinum og Hvirluni. Eftir fyrsta skift var Hvirlan nakað aftanfyri, men hini liðini fylgdust. Á øðrum skiftið, var Treysti fari frá hinum, meðan Hvirlan enn var nakað aftanfyri. Henda støðan helt sær til síðsta túr, og tá Rebekka Fuglø fekk depechina, so visti man at tað var avgjørt hvør fór við fyrsta plássinum. Tað var tætt millum nr tvey og trý, meðan Hvirlan var væl aftanfyri. Síðst á Hvirluliðinum var Alda S. Lamhauge, sum var skjótasti føroyingur á oyggjaleikunum, men her vísti hon at hon dugir at renna 400 m, tí hon tók ein stóran part av muninum upp til hini liðini, men frástøðan var ov stór, so hóast hon uttan iva rann næstskjótasta síðsta tein, so gjørdist endaliga støðan at Treysti vann við tíðini 2 min 28,77 sek. Bragdið gjørdist nr 2 við tíðini 2 min 37,68 sek. Blandaða liðið gjørdist nr 3 við tíðini 2 min 41,26 sek og Hvirlan gjørdist nr 4 við tíðini 2 min 44,65 sek.

Øll úrslitini síggjast her. Fleiri myndir eru í myndasavninum.

Um tað var tí at Vodafone sponsoreraði kappingina við gávukortum, er ilt at vita, men undirtøkan fyri óalmenna føroyameistaraheitinum í at kasta fartelefonir var størri enn vit hava uppliva áður. Fimm manns og sjey kvinnur royndu seg, og úrslitið gjørdist tvey føroysk met.

Kapping í at kasta fartelefonir fer fram á tann hátt at luttakarar velja sær tvær ymiskar fartelefonir. Hesar verða so kastaðar hvør eftir aðrari, og longra kasti verður mált. Tað er frítt hvør fartelefon verður kasta. Einasta krav er at hon er komplett, tvs at battarí og annað er har enn, soleiðis at hon vigar tað, sum hon gjørdi sum nýggj.

Hjá kvinnunum vóru sjey luttakarar, og her var tað Sunniva Bogadóttir, sum kastaði telefonina heilar 51,82 m. Tað er, so vítt vit vita, føroyskt met. Sunniva er ikki ókend við at kasta, tí hon er tann kvinnan sum hevur kasta 500 g spjótið longst her heima í ár. Henni á baki kom Natalia Joensen, sum kastaði 37,24 m, og á triðja plássi var Elin Niclasen, sum eins og Sunniva er von við at kasta spjót í Hvirluni.

Hjá monnunum komu nakrir hondbóltspælarar at royna seg, og tað sást at hesir duga at kasta, tí fyrstur var verandi meistarin, Tróndur Arge, sum kastaði 66,17 m. So kom næsti maður. Hetta var Mark Lausen Marcher, sum er meir kendur sum hondbóltsspælari og venjari í felagnum H71. Tá Mark kastaði fyrstu ferð var eina løtu ivi um vøllurin fór at vera langur nokk, tí fyrsta kasti lendi handan uttastu strikuna, sum er 70 m. Næsta kasti var uppaftur longri. Tað bleiv mált til 81,96 m, sum er uml 5 m longri enn gamla metið, sum spjótvenjarin í Hvirluni, Rógvi Højgaard, átti. Næstu menninir hóttu ikki Mark, tvs ikki fyrr enn síðsti maður, trýstøkkarin Tórur Mortensen royndi seg. Fyrsta kast hjá honum miseydnaðist, men næsta kasti fór langt útum uttastu striku. Tað vísti seg at verða longri enn gamla føroyska metið, men ikki nóg langt til at vinna.

Vodafone hevði latið gávukort til vinnarnar hjá ávikavist kvinnum og monnum umframt eitt gávurkort sum trekt lut var um. Hetta síðsta vann Sigmundur Nolsøe. Trygvi Laksáfoss, sum var oddamaður innan sprint og lop her heima fyri nøkrum árum síðan, men sum nú nýtir tíðina at ogna sær vitan sum medicin-ingeniør í Keypmannahavn, handaði gávurkortini.

Øll úrslitini síggjast her. Fleiri myndir eru í myndasavninum.

Meðan tey eldru royndu seg á Gotlandi, fóru nakrar av yngru kvinnunum í Hvirluni við talentlandsliðnum til Gøteborg at royna seg í kappingini “VU-spelen” sum er ein av heimsins størstu frælsa-kappingum fyri børn og ung. Ein maður, sum nú er í lestrarørindum í Danmark, royndi seg eisini í Gøteborg.

Børka Berg Jørgensen (G13)

Børka hevur verði partur av Hvirluni í fleiri ár, samstundis sum hon eisini hevur vant aðrar ítróttir. Hon er tí væl fyri í nógvum greinum, og í mun til Talentbólkin hjá FÍF, so hevur hon klárað kravið í so ymiskum greinum sum spjótkast og rimarenning. Á VU-spelen var tó avgjørt at hon skuldi fokusera uppá sprint við og uttan rimar. Tvs 60 m og 60 m rimarenning.

Longu fríggjadag var 60 m rimarenning á skránni. Her sást at tað ikki er nakrir standard reglar, tí har hon nýtir 76,2 cm høgar rimar í Føroyum, so er hæddin 68 cm í Svøríki. Í mun til hvussu rennast skal, ger tað tó ikki tann stóra munin. Uppgávan er at koma so skjótt (og lágt) yvir hvørja rim sum gjørligt og lenda við mest møguligar ferð frameftir. Hetta dugir Børka væl, og var tað orsøkin til at hon rann teinin eitt lítið sekund skjótari enn hon gjørdi í februar, tá hon kláraði talentkravið. Tíðin gjørdist 10,55 sek (w: 1,9 m/s).

Leygardagin var so 60 m uttan rimar á skránni. Her var hon í riðli átta av 12. Børka er kvik, og tað vísti hon, tí hon rann teinin uppá 9,13 sek, sum er væl skjótari enn hon hevur runnið teinin uttandura áður.

Elin Niclasen (G14)

Elin hevur vant við Hvirluni síðan oktober í fjør, og her hevur fokus einamest verði á at fáa broyt spjót teknikkin, so at hon uppá sigt kann koma langt út við spjótinum. Slíkar broytingar kosta vanliga nakrar metrar, men Elin hevur vant sera væl, og hevur tí megnað at umstilla seg til nýggja teknikkin óvanliga skjótt. á VU-spelen royndi hon seg á 80 m og í spjótkast.

Báðar greinarnar hjá Elin vóru leygardag. Fyrst var tað 80 m. Her hava vit arbeitt við startinum, har fyrsta fetið er stytt nakað, fyri at hon ikki skal reisa seg ov skjótt og harvið missa ferðøkingina, sum er avgerandi fyrstu fetini úr blokkinum. Í Gøteborg var Elin í tólvta riðli av sekstan. Her rann hon teir 80 metrarnar uppá 11,51 sek, sum er tað skjótasta hon hevur nakrantíð runnið teinin.

Eftir 80 m var spjótkast á skránni. Her hevur fokus verði á at fáa justera teknikkin, og tí var uppgávan nú at testa hvussu robustur teknikkurin var við at satsa, tvs at pressa intensitetin væl longur enn tað letur seg gera til venjing. At pressa so nógv krevur mentala styrki, tí mest sannlíka úrslitið er at tað miseydnast, og so var eisini hjá Elin í tveimum av køstunum, men í tí eina bar til. Hon kastaði 31,35 m, sum er smáar tveir metrar longri enn hon hevur kastað áður. Tað rakk akkurát ikki til eitt pláss millum tær átta, sum komu í finaluna í sterku kappingini.

Sunniva Bogadóttir (G16-17)

Sunniva hevur ein sera góðan arm, sum man plagar at taka til um íðkarar, sum megna at kasta ein bólt ella ein stein serliga langt. Tað er tó ikki bara sum at siga tað at fáa ein slíkan arm til at kasta eitt spjót langt, tí spjótið skal hálast út, í mun til bóltin, sum verður høgdur avstað. Vit hava arbeitt nógv við hesum, og Sunniva er komin væl í gongd við skiftið til spjót, og hevur higartil í ár megnað at bøtt so mikið um sítt persónliga met at hon nærkast metinum hjá Maritu. Í Gøteborg var spjótkast eisini á skránni hjá henni.

Stóra avbjóðingin hjá Sunnivu er at “kasta gjøgnum blokkin” tvs verða føst í vinstru síðu, soleiðis at ferðin í atrenningini kemur upp í spjótið, heldur enn at forsvinna niður í jørðina. Í nøkrum køstum riggar tað, men enn er tað í so óstabilt til at ein kann vanta at tað situr tá intensiteturin fer upp, men testast skal tað, og tað gjørdi Sunniva. Tað vísti seg tó at blokkurin hevði hug at geva seg, men hóast hetta kom hon heilt út á 32,34 m, sum rakk til eitt pláss millum tær átta bestu, hóast Sunniva hoyrur til yngra árgangin í bólkinum.

Lydia Poula Simonsen (G16-17)

Lydia hevur seinasta árið valt kúlustoyt sum sína grein, og her hevur gingið óvanliga skjótt framá, tí frá at verða langt frá at klára nakað krav til talentbólkin, so eru nærum øll stoytini við 3 kg tungu kúluni nú uttanfyri kravi til talentbólkin. Út yvir kúlustoyt, so hevur hon eisini klárað kravið í diskuskast, men í Gøteborg var bara kúla á skránni.

Lydia, sum er sera sterk, hevur arbeitt nógv við at “koma undir kúluna” sum merkir at hon skal, frá byrjan, har kúlan er aftanfyri kroppin í mun til kastirætningin, skal snara kroppin, soleiðis at kroppurin og beinini eru undir kúluni, soleiðis at hon kann trýsta og lyfta kúluna út í einari rørslu. Hetta hevur ednast allasamt betur, men avbjóðingin var at nú skuldi eyka ferð á beinini gjøgnum ringin, og tað gevur styttri tíð til at koma undir kúluna. Lydia hevði tekniskar trupulleikar í Gøteborg, men í síðstu royndini eydnaðist betur, og tá kom hon út á 10,70 m, sum rakk til eitt eitt flott fimtapláss samanlagt, hóast hon hoyrur til yngra árgangin í bólkinum.

Guðrið Káradóttir Petersen (G16-17)

Guðrið, er ein av teimum íðkarunum, sum hava verði við í Hvirluni, síðan felagið bleiv stovnað, og hevur hon tann vegin fingið eina fjølbroytta grundvenjing. Í vetur valdi hon so at fokusera uppá hamarkast, og her hevur solida grundvenjingin saman við góðum basa frá bæði hondbólti og hip-hop gjørt at hon er komin óvanliga skjótt eftir torføra teknikkinum. Í Gøteborg var bara hamarkast á skránni hjá Guðrið.

Størsta avbjóðingin við hamarkast er at megna at “sita” stabil við hamarnum hangandi í passivum ørmum, meðan høgra bein setir allsamt meir ferð á fyri hvønn umgang, uttan at vektin nakrantíð verður flutt yvir á vinstra bein. Hetta, at sita við hamarnum, var nakað, sum fall sera nátúrligt fyri Guðrið, men at halda vektina á vinstra hevur verði avbjóðingin. Hon hevur tó arbeitt væl við hesum, og tá tað riggar, so flýgur hamarin lætt útum 30 m strikuna. Kapping er tó nakað heilt annað, og í Gøteborg gjørdu boðini frá venjarnum um at fara agressivt inn í fyrsta umgang, at fyrstu tvey kastini fóru í netið. Guðrið vísti tó at hon er mentalt sterk, tí hon tordi at halda fast við ferðina, og í triðja kasti eydnaðist tað henni at fáa hamaran út. Longdin bleiv máld til 38,59 m, sum er meir enn fýra metrar longri enn hon hevur kastað áður, og tískil eisini góðar fýra metrar longri enn gamla bólkametið.

Tummas Napoleon Arge (Menn)

Ein av “eldru” hvirlunum, er Tummas Napoleon Arge, sum vandi við Hvirluni frá tí hon var stovna inntil hann á sumri í 2015 fór av landinum í lestrarørindum. Hann venur í løtuni í felagnum Hvidovre í Danmark. Tað er eyðsýnt at hann venur væl, tí hann hevur runnið skjótt í øllum kappingum í ár. Í Gøteborg var 100 m og 200 m á skránni.

Leygardag var 100 m á skránni. Her rann Tummas Napoleon í riðli fýra av átta. Her rann hann sín skjótasta 100 m nakrantíð. Tíðin gjørdist 11,39 sek, sum bara er 0,12 sek frá føroyska metinum. Á 200 m rann hann í riðli átta av níggju, og her gjørdist tíðin 23,87 sek. 

 

Samanumtikið er sera hugaligt at síggja næsta ættarlið av hvirlum taka táttin upp eftir teimum, sum nú eru farin ella eru ávegis av landinum í lestrarørindum, har fleiri hava valt at halda áfram við frælsu ítróttini.