Nógv persónlig met og heiðursmerkir á FMU

Síðsta dagin av ársins FMU vístu ungu hvirlurnar aftur, hvussu nógv tær hava tikið seg og støðugt taka seg fram í ymsu greinunum.

Dreingir 10-11 ár

Dánjal Olsen legði fyri við stytsta sprintteininum, 60 m, har hann skuldi renna á geil 3. Eins og á 200 m fyrra dagin, so kom hann væl avstað, og hann kempaði væl í eintum tøttum dysti um silvurmerkið frá byrjan til enda. Her var hann eitt vet ov stuttur, men hann ognaði sær eitt flott persónligt met við tíðini 10,27 sek.

Dánjal royndi seg eisini við 2,0 kg tungu kúluni. Her legði hann hart út, tí longu í fyrstu royndini stoytti hann 2,0 kg tungu kúluna út til 5,78 m. Næsta royndin var kolldømd, men í triðju kom hann aftur langt út, tó ikki heilt líka langt sum í fyrstu royndini. Hann ognaði sær harvið bronsumerkið fyri teir 5,78 m hann megnaði í fyrsta umfari.

Gentur 12-13 ár

Fyrra dagin rann Elena Ellindsdóttir Olsen seg til eitt pláss í finaluni á 80 m. Henda finalan var fyrsta kapping hjá Elenu annan dagin. Aftur var hon skjót avstað, og so var at koma í sprint-positiónina. Hetta eydnaðist betur enn fyrra dagin. Tíðin gjørdist tó eitt vet verri, tí har var munandi minni undanvindur. Tíðin gjørdist 13,02 sek, sum bara er 0,05 sek seinni enn í innleiðandi riðlinum.

Eftir 60 m finaluna, fór Elena nærum beina leið til longdarlop. Hon hevur einans verið við til eina venjing í hesi grein, og har var fokus at fáa atrenningina at sita, bæði tempo og rútmu. Av tí at longdarlop enn er nýggj grein fyri Elenu var valt at brúka 10 fets atrenning. Hetta tryggjar eina stabilari atrenning, og harvið betur møguleikar fyri at kunna arbeiða við lopinum. Atrenningin sat perfekt øll trý lopini hon slapp at leypa. Hennara fyrsta gjørdist tað longsta hesaferð. Tað bleiv máta til 3,41 m.   

Elena endaði dagin við at renna 300 m. Her vísti hon aftur, hvussu nógv hon hevur tikið seg fram, tí eftir at hava kempa væl allan vegin segði klokkan 53,84 sek, sum er heili seks sekund skjótari enn hennara gamla persónliga met. Hetta rakk til eitt bronsumerki.

Beinta Debes royndi seg við 2,0 kg tungu kúluni. Beinta hevur áður víst at hon er kná við kúluni, og hesaferð vísti hon enn einaferð at hon dugir við kúluni, tí longu í fyrsta umfarið legði hon heilar 63 centimetrar omaná sítt persónliga met. Næsta var eitt vet styttri, meðan tað síðsta miseydnaðist. Hon ognaði sær silvurmerk við við teimum 7,67 m í fyrsta umfari.

Gentur 14-15 ár

Jóhanna Súnadóttir Pedersen og Kristina Verlandsdóttir Hayfield byrjaðu dagin við at stoyra 3,0 kg tungu kúluna. Kappingin millum tær báðar um gullið endaði sum ein gysari, har Kristina legði út við at stoyta kúluna út á 5,89 m, meðan Jóhanna kom út á 5,64 m. í øðrum umfarið tók Jóhanna fyrsta plássi tá hon økti til 6,20 m, sum er persónligt met. Kristina royndi at svar aftur, og í triðja kom hon út á 6,14 m og ognaði sær persónligt met, men enn vantaðu 6 centimetrar. Jóhanna svaraði aftur við 6,31 og bøtti harvið um sítt persónliga met. Í fjórða og síðsta umfarið kom hon út á 6,36 m og bøtti harvið aftur um sítt persónliga met, og tók harvið fyrsta pláss. Jóhanna svaraði enn einaferð aftur, og hesaferð rakti hon kúluna plett, tí hon endaði heilt úti á 6,63 m, og tók harvið gullið. Samstundis bøtti hon um sítt persónliga met við 67 cm. Kristina á øðrum plássi bøtti um sítt persónliga met við 25 cm.

So var 100 m á skránni, og her var Jóhanna aftur klár at royna seg. Jóhann hevur partvís arbeitt við at brúka blokkin betur í startinum og partvís við at fáa eitt effektivari fótísetan, soleiðis at hon betur fær útnytta elastisku orkuna í senunum. Í startinum fekk hon betur avsett í blokkinum enn hon plagar, og tá hon kom upp at sprinta var hon munandi lættari á fótum enn hon hevur verið. Hetta var orsøkin til at tíðin á málinum segði 13,85 sek, sum er 0,49 sek undir hennara gamla persónliga met, og eisini undir kravið til talentbólkin hjá FÍF.

Jóhanna helt áfram til 300 m startin. Aftur vísti hon at starturin er blivin munandi betur og aftur vísti hon nýggjari effektivari rennistílin. Ferðin var tískil høg, men av tí at hon enn ikki er byrja at venja sprintúthaldni, so megnaði hon ikki at halda optimala ferð allan vegin. At toppferðin er høg er ongin ivi um, tí hon megnaði at renna teinin meir enn 4 sek skjótari enn hon hevur gjørt áður. Hetta rakk til eitt silvurmerkið.

Dreingir 14-15 ár

William á Lava Persson legði út við longdarlop. Í Fyrsta lopið var hann eitt sindur varðin, men rakti tó plankan perfekt. Úrslitið gjørdist eitt lop uppá 3,28 m. Næsta var rættuliga líkt, men so flutti hann startin eitt vet og harvið var lættari at halda ferðina út í lopið. Hetta gjørdi at hann kom út á 3,46 m, sum er 10 centimetrar longri enn hann hevur lopið áður. Fjórða og síðsta lop var nakrar centimetrar styttri, men hann ognaði sær silvurmerkið fyri teir 3,46 m hann leyp í triðja umfari.

William royndi seg eisini á 100 m. Her bleiv starturin eitt sindur løgin, tí ein miskiljing gjørdi at William ikki hevði hita upp. Tá hansara navn bleiv rópt upp var hann tó til dystin fús. Hann gjørdi seg kláran á startinum, og tá skotið fór spenti hann í. Hetta var fyrsti 100 m í trý ár, og hann vísti hvussu nógv hann hevur tikið seg fram, tí hann rann heili 13 sek skjótari enn síðst hann royndi seg. Tíðin gjørdist 17,41 sek.

Dreingir 16-17 ár

Miso Buha hevði valt at fokusera uppá 100 m hesaferð. Miso hevur arbeitt nógv við at fáa størri rørslur, og at halda effektiva kraftútvikling gjøgnum sprinti. Hetta eydnaðist stak væl hjá honum, men tíðanverri var hann ov ótolin í startinum. Hetta gjørdi at hann ikki kom upp í ferð fyrr enn eftir fyrstu 20 metrarnar, men tá sat effektiva drive hjá honum, og soleiðis megnaði hann at renna teinin uppá  11,72 sek, sum var nóg mikið til at ogna sær gullmerkið. Tíðin er 0,07 sek skjótari enn hann hevur gjørt áður, og soleiðis megnaði Miso í fjórðu kapping á rað at bøta um sítt persónliga met.

Gentur 18-19 ár

Lýdia Poula Simonsen royndi seg í síni sergrein kúlustoyt, har hon eigur føroyska metið. Í ár hevur tað ikki gingið eftir vild, og tí arbeiðir Lýdia við at finna gamlan formin aftur. M.a. arbeiðir hon við at fáa meir effekt úr beinunum, sum verður umsett umvegis eina forskjóting í bulinum. Í fyrsta umfarið kom hon út á 10,05 m. Næstu tvær royndirnar blivu brúktar til at justera tað tekniska. So skuldi tað standa sína roynd í fjórða umfarið, og her kom Lýdia út á 10,14 m. Síðstu tvey umførini royndi hon so aftur at koma enn longur, men hóast tey tekniskt vóru á góðari leið, so var forskjótingin í bulinum ikki heilt har. Hennara longsta gjørdist tískil 10,14 m, sum hon fekk gullmerkið fyri.

Góður dagur á Tórsbreyt

Fleiri hvirlur høvdu valt at royna seg á fyrra degnum av ársins FM fyri ung.

Dreingir 8-9 ár

Hjá teimum yngstu dreingjunum byrjaði Eyðun Ellindsson Olsen dagin við at renna 60 m, har hann hevði fingið tilluta geil 2. Eyðun, sum venur á “týsdagsliðinum”, er ein góður fightari, og aftur vísti hann at hann megnaði at kempa. Hann rann eina góða kapping og við tíðini 11,47 sek skar hann 1,42 sek av sínum persónliga meti.

Eyðun fór síðan til longdarlop. Her legði hann út vit at leypa 2,71 m, sum bara er 4 centimetrar frá hansara persónliga meti. Næsta lopið misteydnaðist, men í triðja riggaði betur. Hann kom to ikki longri enn í fyrsta, og tískil gjørdust tær 2,71 m frá fyrsta umfarið hansara besta hesaferð.

Dreingir 10-11 ár

Dánjal Olsen legði út við at kasta 145 g tunga bóltin, sum mest líkist eini gular golfkúlu. Hetta er grein, hann ikki hevur kappast í áður, men at hann lærir skjótt sást tí eftir at hava kasta 23,68 m í fyrsta umfarið legði hann 5 m afturat í øðrum og aftur 2 metrar í triðja, soleiðis at hann endaði við at kasta 30,34 m, sum hann fekk eitt silvurmerkið fyri.

Næsta kappingin hjá Dánjal var longdarlop. Aftur hesaferð var hetta hansara fyrsta kapping í greinini. Hann legði tó hart út, tí at lopið bleiv máta til heili 2,98 cm. Í næsta lopið var hann eitt sindur varin, men fekk góða hædd á. Lopið bleiv máta til 2,94 m. Í triðja og síðsta lopið hevði hann góða ferð, men her fekk hann ikki hædd á. Longdi gjørdist tí aftur 2,94 m, men hann ognaði sær eitt broncumerkið við teimum 2,98 m hann leyp í fyrsta umfarið.

Gentur 12-13 ár

Elena Ellindsdóttir Olsen byrjaði dagin við at renna 80 m innleiðandi. Elena hevur í seinastuni arbeitt við at optimera sprint-positiónina, tvs hvussu kropsburðurin er í ymsu fasunum av sprint og at fáa meir kraft í fyrstu fetini. Elena var í fyrra riðlinum, har hon hevði fingið tilluta geil 2. Tá skotið fór vísti Elena at har er komin meir kraft í fyrstu fetini, tí hóast hon ikki brúkti start blokk, so var hon ein av teimum skjótaru avstað. Sprint-positiónin sat ikki, men sterki viljin gjørdi at hon við tíðini 12,97 sek rann seg til eitt pláss í finaluni, sum er í morgin (sunnudagin). Tíðin er 0,3 sek skjótari enn hon hevur runnið teinin áður.

Næsta kappingin hjá Elenu var hæddarlop. Her legði hon út við at taka yvirliggjarin niður við í fyrstu royndini á 95 cm. Ein lítil justering gjørdi, at hon kom trygt uppum í næstu royndini. Hon kom somuleiðis trygt uppum í fyrstu royndini á 100 cm, og tangeraði harvið sítt persónliga met. So fór yvirliggjarin upp á 105 cm. Her miseydnaðist fyrsta royndin, men í næstu royndini kom hon eisini uppum hesa hæddin og legði sostatt 5 cm afturat sínum persónliga meti. Hetta bleiv eisini endaliga úrsliti hjá henni.

Síðsta einstaklingakappingin hjá Elenu var 600 m, sum henni dámar stak væl. Her valdi hon at leggja varliga út og eftir fyrstu 200 m lá hon nakað aftanfyri tað fremstu, hon økti tá eitt sindur um ferðina og eftir 400 m lá hon ájavnt við tað fremstu. So økti hon aftur, og harvið legði hon avstand millum seg og hinar allan vegin til mállinjuna. Á málinum segði tíðin 2 min 4,53 sek, sum er 10 sek skjótari enn hon hevur runnið teinin áður. Fyri avrikið fekk hon gullmerkið.

Gentur 14-15 ár

Kristina Verlandsdóttir Hayfeld og Jóhanna Súnadóttir Pedersen byrjaðu sítt FMU við at kasta 0,75 kg tunga diskin. Hvørgin venur diskuskast, men tað er altíð stuttligt at royna aðrar greinar enn tann man venur. Kristina byrjaði við at kasta 12,20 m. Jóhanna byrjaði varliga, men í øðrum umfarið kom hon út á 12,06 m, sum er persónligt met við lítlum ½ metri. Kristina økti í øðrum til 13,08 og í triðja til 14,90 m, sum er persónligt met við 16 cm. Kristina kom ikki longri, men í fjórða og síðsta umfarið (í Føroyum sleppa yngru bólkarnir ikki at royna seg í heilari kapping) kastaði hon 12,99 m og endaði sostatt við at leggja 1,22 m omaná sítt persónliga met. Tær báðar endaðu sum nummar eitt og tvey.

Næsta kappingin hjá Kristinu var 800 m, sum er teinur henni dámar sera væl. Kristina hevur arbeitt nógv við at betra um úthaldni, men valdi tó at leggja varliga út í mótvindinum. Hon helt eina støðuga ferð, har stílurin var góður. Tá 200 m vóru eftir økti hon munandi um ferðina. Hetta gjørdi at tíðin á málinum segði 2 min 46,58 sek, sum bara er 1,44 sek frá hennara persónliga metið. Hon fekk silvurmerkið fyri avrikið.

Síðsta kappingin áðrenn boðrenningina var spjótkast, har bæði Jóhanna og Kristina royndu seg. Her legði Kristina út við at kasta 14,18 m. Jóhanna svaraði aftur við at kasta 16,14 m, sum er 1,63 m longri enn hon hevur kastað spjótið áður. Kristina var tó skjót, tí í øðrum umfarið kom hon út á 19,92 m, sum er 2,18 m longri enn hon hevur kastað spjótið áður. Báðar løgdu tær nógv fyri í royndini at koma longur út, men hesaferð komu tær ikki longri út. Tær fingu ávikavist gull og silvur fyri avrikið

Gentur 18-19 ár

Lýdia Poula Simonsen legði út við at kasta 1,0 kg tunga diskin, har hon eigur føroyska metið. Avtala var at hon royndi at fáa meir dynamikk inn í kastið við at fokusera uppá at sprinta fram og at fáa vinstra skjótt niður til blokk. Hetta er ikki nakað hon hevur arbeitt við, og tí miseydnaðust fyrstu kastini, men í fjórða fekk hon rørslurnar at sita og lendi diskurin á 24,71 m. í fimta kom meir ferð á beinini og kom diskurin útum 30 m strikuna. Tað bleiv mátað til 31,00 m. Tað síðsta miseydnaðist, men Lýdia fór heim við gullinum fyri teir 31 m í fimta umfarið.

Næsta kappingin hjá Lýdiu var spjótkast, har Sunniva Bogadóttir eisini royndi seg. Hetta er grein har Sunniva er í einum serflokki her heima og fyri tann skuld í Danmark eisini, tí hon hevur umboðað Danmark í landsdysti. Sunniva valdi tó at taka tað róligt hesaferð, tí hon skuldi spæla finalu í hondbólti um lionsbikari beint eftir kappingina. í fyrsta kasti kom hon alt ov nær strikuni og kastaði tí nærum standandi. Tær 32,09 m var tó nóg mikið til at vinna kappingina. hon royndi eitt kast afturat, men tað bleiv eitt vet styttri. Lýdia, sum ikki plagar at kasta spjót, legði út við at kasta 22,60 m. í øðrum umfarið kom hon út á 24,43 m, sum er 33 centimetrar longri enn hennara persónliga met. Næstu kastini vóru øll omanfyri 20 m, men hon kom tó ikki útum teir 24,43 m hon kastaði í øðrum umfarið. Tær báðar fingu ávikavist gull og broncu fyri avriki.

Boðrenning

Kristina og Jóhann megnaðu at savna eitt lið til 4×100 m við at biðja Elenu, sum annars er partur av yngra bólkinum og so einari úr Bragdinum. Hesar, sum vóru 12-15 ár skuldu royna seg móti 18-19 ára liðum við 18-19 ára gomlum gentum. Elena rann fyrsta túr, og misti hon eitt vet til hinar. Eftir eitt sera trygt skifti rann Jóhanna nakað inn á hinar og avleveraði í einum skifti, sum var líka við at miseydnast til Kristinu, sum rann seinna sving. Kristina avleveraði síðan til gentuna úr Bragdinum sum rann heim. Tær vunnu sær broncumerkið fyri avrikið.

Gott FM hjá Hvirluni

Aftur í dag stóðu hvirlurnar fyri nógvum sera góðum úrslitum soleiðis at samlaða úrtøkan gjørdist 10 gull, 7 silvur og 6 bronsumerkið umframt at heilar fimm hvirlur kláraðu oyggjaleikakrav (Guðrið: hamarkast, Sunniva: spjótkast, Lýdia: kúlustoyt, Elin: spjótkast og Dánjal: 200 m).

Spjótkast, menn (Rógvi Højgaard)

Fyrsta kappingin var tá menninir royndu seg við 800 g tungu spjótunum. Her var veteranurin Rógvi Højgaard, sum vann bronsumerki á oyggjaleikunum á Bermuda, við. Rógvi er givin av venja, men hann vísti longu í fyrsta kasti at hann dugur enn. Hann kom væl inn og fekk konvertera ferðina til forspenni í kroppinum, sum bleiv útloyst til eitt kast uppá 42,55 m. Hann kom tó í so tætt uppá at gera yvirtrakk, og tí helt hann aftur í avleveringini. Eftir at hava lopið næsta kasti um, royndi hann aftur. Hann byrjaði longur vekk, og nú sat betur, hann fekk aftur tað tekniska at sita, men hesaferð førdi hann kasti ígjøgnum. Úrslitið gjørdist 43,98 m, sum rakk til eitt gullmerkið.

200 m, kvinnur (Meiken Salberg Olsen)

Aftur í dag var tað Meiken sum umboðaði Hvirluna í sprint. Hesaferð var hon á geil 5 í riðli tvey tá runnið var um eitt pláss í finaluni. Starturin var í byrjanini av svinginum, og hetta hevur Meiken ikki vant. Tað sást tó ikki, tí hon kom væl avstað, og var skjót upp í ferð. Hon kempaði væl í svinginum og helt ferðina tá hon kom úr svinginum. Á langsíðuni var uppgávan at halda ferðina, og hetta megnaði hon væl, tí á málinum segði tíðin 39,35 sek, sum er 1,13 sekund skjótari enn síðst hon rann teinin.

Spjótkast, kvinnur (Sunniva Bogadóttir, Elin Niclasen, Guðrið Káradóttir Petersen)

Tá kvinnurnar hitaðu upp við 600 g tungu spjótunum var tíð at seta seg at njóta kappingina, tí her vóru tvær við, sum báðar hava víst sera høgt støði við spjótinum. Elin er tó enn so mikið ung at hon til dagligt kappast við 500 g tunga spjótinum, meðan Sunniva, sum fyrr í ár var uttanfyri 40 m strikuna, er við at koma fyri seg aftur eftir ein skaða í albogan, og skuldi royna seg í síni fyrstu kapping síðan FM í 2019. Tað var Sunniva, sum byrjaði kappingina við einum braki, tí longu í fyrsta umfarið kastaði hon spjóti út á 38,14 m, sum bara er 32 cm frá føroyska metinum hon setti á FM í fjør. Elin fylgdi við og kastaði 35,74 m, sum er 4 centimetrar styttri enn hon kastaði á FM í fjør. Annað umfarð broytti onki, men í triðja stytti Elin um munin við at kasta 36,38 m, sum er persónligt met. Báðar royndu tær at koma longri, men støðan var tann sama til síðsta umfarð, tá Elin fekk meir íntensitet í atrenningina, og fekk hetta flutt yvir í spjótið sum meir ferð. Tað sást at tað var nær við, men tó ikki heilt har. Kasti bleiv máta til 37,61 m. Sunniva fór sostatt við gullinum, 53 centimetrar frammanfyri Elin, meðan Guðrið á fimta plássi kastaði 24,59 m. Sunniva kláraði, sum tann sætta Hvirlan higartil, kravið til oyggjaleikirnar, meðan Elin sum áður hevur klára tað, enn einaferð var omanfyri kravið.

1500 m kvinnur (Kristina Verlandsdóttir Hayfield)

Kristina hevur víst støðuga framgongd í flestu greinum, og hava venjingartíðir eisini víst at hetta ikki kemur av ongum. Hetta hevði hon við sær tá 1500 m fóru í gongd. Her legði hon eitt sindur varligari út enn hon gjørdi á 800 m fyrra dagin av FM. Fokus var at halda ein lættan stíl og so annars halda eina støðuga ferð. Hetta megnaði hon væl. Tá 200 m vóru eftir setti hon ein spurt inn og økti ferðina munandi inn móti málinum. Á málinum segði tíðin 4 min 49,46 serk, sum er 6½ sek skjótari enn hon hevur runnið teinin áður. Fyri hetta ognaði hon sær eitt bronsumerki.

200 m menn (Dánjal Dahl Ljósheim, Miso Buha)

Dánjal og Miso høvdu báðir givið avboð til aðrar greinar fyri at fokusera uppá 200 m, so tað var ikki uttan spenning at teir gjørdu seg klárar. Miso á geil 2 og Dánjal á Geil 3. Tá skotið fór var Dánjal skjótur avstað, meðan Miso ikki fekk ferðina upp fyrstu fetini. Eftir teir fyrstu 30 m var ferðin hjá Miso komin upp, og úr svingini vóru nakrir fáir metrar millum teir, Dánjal fremst og Miso á einum triðja plássi. Miso megnaði best at halda ferðina síðstu 100 metrarnar, men Dánjal megnaði at halda leiðsluna og vann við tíðini 23,28 sek meðan tíðin hjá Miso á øðrum plássi gjørdist 23,35 sek. Tíðin hjá Dánjal er undir kravtíðina til oyggjaleikir, og sostatt hevur Dánjal nú klára kravið á bæði 200 m og 400 m teininum, meðan Miso, sum skar 0,95 sek av sínum persónliga met og samstundis tók bólkametið, bara manglaði 0,05 sek í at klára kravið.

Kúlustoyt kvinnur (Lýdia Poula Simonsen, Elin Niclasen, Guðrið Káradóttir Petersen)

Í kúlustoyt var ikki tann stóri spenningurin um gullið, tí Lýdia er tað fremri enn hinar. Í seinastuni hevur tað ikki rigga heilt hjá Lýdiu, og tí var fokus í hesi kappingini at fáa stabilisera nøkur teknisk element sum hon hevur arbeitt við. Fyrstu royndirnar vóru eitt sindur varnar, men tað, hon hevur arbeitt við sá út til at halda. Í fjórðu royndini setti hon so meir ferð á og tá kom hon út á 10,69 m. Síðsta royndin var eitt vet styttri. Har var ein tøtt kapping um silvurmerki millum Elin og Guðrið, har Elin endaði við at draga longra stráði við 8,45 m, meðan Guðrið fór við bronsuni við 7,90 m. Lýdia kom aftur útum oyggjaleikakravið.

Kúlustoyt, menn (Dánjal Dahl Ljósheim)

Hjá monnunum var Dánjal tann einasta Hvirlan sum royndi seg. Kúlustoyt er ikki ein grein hann venur, so tilgongdin var at halda tað einkult. Hetta riggaði væl, tí tá hann í øðrum umfarið kom út á 8,89 m var kappingin í verðuleikanum avgjørd. Hann økti tó vil 8,93 m í fjórða, sum gjørdist hansara  longsta hesaferð. Harvið ognaði hann sær gulli aftur í ár, og við neyvt somu longd sum í fjør.

Boðrenningar vóru at enda, og her høvdu Dánjal og Miso sligið seg saman við tveimum rennarum úr Treysti. Liðið hjá teimum ognaði sær silvurmerki.

Fleiri myndir eru í myndasavninum.