LOADING

Type to search

FMU 2021 – dagur 3

Kast Lop miðtein sprint tíðindi

FMU 2021 – dagur 3

Share

Aftur triðja dagin komu nógv góð úrslit tá ungu hvirlurnar kýttu seg á Tórsbreyt.

Dreingir 10-11 ár

Jóhan Waagstein byrjaði dagin við at leypa longdarlop. Hetta er grein, har hann hevur lopið væl áður, og so var aftur hesaferð. Longu í fyrsta lopið kom hann heilt út á 3,44 m, sum er tangering av hansara persónliga meti. Við hesum legði hann seg á eitt deilt fyrsta pláss eftir fyrsta umfarið. Lopið í øðrum umfarið var eitt vet styttri, men tó nóg mikið til at taka fyrsta pláss (um tað stendur á jøvnum, so er tað næstlongsta sum avgerð hvør er fremst). Í triðja sat atrenningin ikki, og tískil fekk hann ikki bøtt um, og tá hin bøtti um sítt, so endaði Jóhan við einum flottum silvurmerki.

Jóhan Waagstein

Jóhan fór síðan til 300 m startin, har hann hevði fingið tilluta truplu geil 5. Orsøkin til at hendan geilin er trupul er at man, av svingi er longri, byrjar frammanfyri hinar. Tað merkir at man ikki sær hinar fyrr enn man eftir 200 m kemur úr svinginum. Hann rann væl fyrstu 100 m, men var í so varðin í svinginum. Tískil fóru hinir framvið miskeiðis í svinginum. Hetta gjørdi at Jóhan fann eyka ferð, og kempaði væl, men longri teinurin gjøgnum restina av svinginum gjørdir, at hann var ov langt aftanfyri, men hann kempaði allan vegin og fekk tíðina 55,81 sek fyri avrikið. Tað rakk til eitt fjórða pláss samanlagt.

Jógvan Ziska Simonsen

So var kúlustoyt á srkánni. Her fóru Jóhan og Jógvan Ziska Simonsen at royna seg við 2,0 kg tungu kúluni. Jóhan legði út við at stoyta kúluna út á 6,09 m, sum er 1 cm longri enn hann hevur stoytt kúluna áður. Harvið legði seg á fyrsta pláss, men Jógvan svaraði við at stoyta kúluna heilt út á 7,52 m, sum er góðan 1½ m longri enn hansara persónliga met. Jóhan, sum var farin niður á triðja pláss, kom út á 6,40 m í øðrum umfarið og bøtti harvið aftur um sítt persónliga met, og tók harvið annað pláss aftur. Í triðja umfarið endurtók søgan seg. Jóhan bleiv yvirhálaður, men ongin hótti Jógvan. Jóhan svaraði tó aftur við at koma út á 7,11 m, bøtti harvið um sítt persónliga met við góðum metri, og ognaði sær endaliga silvurmerkið aftanfyri Jógvan, sum fór heim við gullinum.

Gentur 12-13 ár

Bjalla Beintudóttir Dalsgarð og Sólja Rye byrjaðu sín dag við at stoyta 2,0 kg tungu kúlurnar. Bjalla legði út við at stoyta kúluna út á 6,11 m, og legði hon seg harvið á triðja pláss, framanfyri Sólju sum við 3,59 m legði seg á fjórða pláss. Hvørgin bøtti í øðrum umfarið, men í triðja fekk Bjalla betri tr‎ýst á kúluna, sum lendi á 6,18 m, sum gjørdist hennara besta. Fyri tað fekk hon bronsumerki. Sólja endaði á einum fjórða plássi við teimum 3,59 m hon kom útá í fyrsta umfarið.

Sólja Rye

Bjalla og Sólja fóru síðan til longdarlop, har Elena Ellindsdóttir Olsen eisini var klár. Her legði Elena út við at leypa 3,75 m og legði seg harvið á triðja pláss. Bjalla leypa 3,23 m, sum er longri enn hon hevurl lopið áður, meðan Sólja somuleiðis leyp sítt longsta lop higartil við 2,28 m. Allar royndur tær at koma longri, men hesaferð var tað bara Bjalla, sum fekk tað at rigga, tí í øðrum umfarið kom hon út á 3,27 m, sum er n‎ýtt persónligt met. Tað endaði við at Elena ognaði sær bronsumerkið 7 cm frá silvur og 1 cm frá fjórða plássi.

Bjalla Beintudóttir Dalsgarð

Elena royndi seg eisini á 600 m teininum, har hon áður hevur víst at hon er sterk. So var eisini hesaferð, tí tá skotið fór, var hon skjót fram í oddin har dróg hinar við sær. Tað var tó skjótt at hennara effektiva renning, sleit hinar upp, og tá 400 m vóru farnir, var hon einsamøll á odda, og allan vegin á mál økti hon. Á málinum segði tíðin 2 min 3,93 sek, sum bara er 2 sek frá hennara persónliga metið. At renna so nær við sítt persónliga met í nógva vindinum tíður uppá, at hon er klár at renna undir 2 min á hesum teininum.

Elena Ellindsdóttir Olsen

Dreingir 12-13 ár

Arni Bartal Joensen royndi seg á fyrsta sinnið við 3,0 kg tungu kúluni. Longu í f‎yrsta umfarið kom hann heilt út á 7,11 m, sum er væl longri enn hann áður hevur megnað, at stoyta 2.0 kg tungu kúluna, sum yngru íðkararnir n‎‎‎ýta. Næsta var eitt vet styttri. Í triðja og síðsta umfarið valdi Arni Bartal at royna rotatións-teknik, sum er tað, íð nærum allir top-kúlustoytarar n‎ýta í dag. Hetta sá gott út, men stoyti bleiv tó ikki heilt líka langt sum hini, so Arni Bartal fekk gullmerkið fyri teir 7,11 m, hann stoytti í fyrsta umfari.

William E. S. Kruse

Arni Bartal fór síðan til longdarlop, har William E.S. Kruse eisini fór at royna seg. Her legði William út við at leypa 3,23 m og legði hann seg harvið á annað pláss, beint frammanfyri Arna Bartal, sum leyp 3,09 m. Hvørgin bøtti í øðrum umfarið, men í triðja bøttu báðir, men hóast Arni Bartal kom út á 3,11 m, so rakk tað ikki at taka William sum leyp 3,43 m. Teir endaðu sostatt við silvur og bronsumerkinum í kappingini.

Tá skotið fór til 600 m kapprenningina, sum er 1½ umgangur á Tórsbreyt, var Arni Bartal aftur við. Hann legði harðliga út, men eftir fyrstu 100 m slakkaði hann eitt vet av, og helt síðan ferðina restina av teinum. Tíðin gjørdist 2 min 17,47 sek, sum er persónligt met. Fyri avrikið fekk hann silvurmerki.

Arni Bartal Joensen

Gentur 14-15 ár

Ai Waagstein, sum verðuliga er við at taka kastigreinarnar til sín, byrjaði triðja dagin við at vita, hvussu langt hon megnaði at stoyta 3,0 kg tungu kúluna. Fyrsta fór nærum beint upp í luftina, men kúlan lendi tó á 6,11 m, sum rakk til eitt annað pláss. Í næsta fekk hon justera vinkulin betur, og kom hon tískil út á 6,48 m og tók harvið fyrsta pláss. Hon steðgaði tó ikki har, tí í triðja fekk hon albogan afturum kúluna og fekk tískil verðuliga tr‎‎ýst. Harvið økti hon um leiðsluna til 7,13 m og aftur í fjórða økti hon, hesaferð til 7,23 m. Tað gjørdist hennara longsta á degnum, men tað rakk til eitt trygt gullmerkið.

Ai Waagstein

Næsta kappingin hjá Ai var longdarlop. Her legði hon út við at leypa 3,11 m, hon økti tó í triðja til 3,39 m, sum er tað longsta hon hevur lopið. Har var tó meir eftir tí í fjórða kom hon út á 3,40 m. Fimta var eisini langt, men ikki heilt líka langt. Hon fekk bronsumerkið fyri teir 3,40 m hon leyp í fjórða umfarið. Nevnast kann at hetta var næsta kappingin í longdarlop hjá Ai, men enn hevur hon til góðar at fáa eitt lop, har vindurin er minni enn mest loyvda til at fáa met góðkend.

Ai endaði sína luttøku á FMU við at renna 800 m. Nógvu kappingarnar høvdu sett síni spor, men Ai er fightari, so tá skotið fór, so var hon skjótt upp í ferð, og royndi hon so at halda ferðina. Fyrsta umgangi sá hetta gott út, men tá hon millum 500 og 600 m aftur skuldi kempa við nógva mótvindin, fór ferðin nakað niður, hon helt tó tr‎ýsti og síðstu 100 m sprintaði hon tað hon kundi. Úrslitið gjørdist 3 min 2,40 sek, sum er persónligt met við góðum 4 sekundum. Fyri tað fekk hon gullmerkið.

Dreingir 14-15 ár

Villiam á Lava Persson royndi seg í longdarlop, har hann til venjing hevur havt nøkur góð lop. Hann hevur primert arbeitt við at fáa stabilisera atrenningina, har hann áður hevur trippa (tikið nøkur smá títt fet) fyri at umganga at gera yvirtrakk. Hetta gjørdi hann í fyrsta lopinum, sum bleiv máta til 3,61 m. So var avtala at flyta startin eitt sindur longri vekk, men hann skuldi halda rútmuna gjøgnum avsetti. Hetta gjørdi hann og var rútman góð gjøgnum avsetti, og lopið var væl longri, men tíðanverri yvirtrakk. Sama endurtók seg í triðja lopð, har tað sá út til at hann leyp væl útum 4 m strikuna (Hansara persónliga met er 3,75 m), men tíðanverri segði merki í modelervoksinum á plankanum at hann hevði gjørt yvirtrakk við 3-4 mm. Síðstu tr‎‎ý lopini vóru meinlík, tí hóast starturin var fluttur, so hendi tað, sum ofta hendur, at man óbevíst broytur rennihátt, soleiðis at fetini blíva longri. Úrslitið var at øll gjørdist yvirtrakk, men hann fekk gullmerkið fyri teir 3,61 m hann leyp í fyrsta umfari.

Villiam á Lava Persson

Gentu 18-19 ár

Elin Niclasen valdi at royna seg í kúlustoyt eisini. Her legði hon út við at stoyta 4,0 kg tungu kúluna út á 7,53 m. í næsta umfarið kom hon út á 8,00 m og í triðja út á 8,01 m. Hóast tað einans vóru tveir luttakarar, so gjørdist kappingin, vegna óvanliga langar steðgir millum hvørt umfarð, óneyðuga drúgv, og tí valdi Elin at steðga. Hon ognaði sær gullmerkið við teimum 8,01 m hon stoytti í triðja umfari.

Elin Niclasen

Fleiri myndir síggjast á: https://photos.app.goo.gl/DgwLcPnwpsY9MRpk7

Previous Article
Next Article

Leave a Comment

Your email address will not be published. Required fields are marked *