Føroyskt met og oyggjaleikakrav á GP3

Børn 5-7 ár

Í yngsta bólki vóru tað heilar tríggjar hvirlur sum royndu seg. Allar royndu tær sítt besta, og hugnaðu sær óført ímeðan. Hjá dreingjunum var tað Lui E. Olsen, sum legði út við at leypa 1,24 m, fyri síðan at økja til 1,46 og síðan til 1,56 m.

Hjá gentunum leyp Sigga Dam Dalsgaard fyrst 1,03 m fyri síðan at økja til 1,51 m.

Barbara Sól byrjaði við at leypa 0,90 m, og hon økti so til 0,98 m og at enda til 1,18 m.

Dreingir 8-9 ár

Eyðun Ellindson Olsen byrjaði dagin við síni favoritgrein; longdarlop. Hann legði út við at leypa 2,63 m. Eyðun vildi meir og økti hann tí í øðrum til 2,69 m. Hann var tó bara við at koma í gongd, tí í triðja og síðsta umfarið økti hann til 2,71 m, sum sostat gjørdist hansara longsta hesaferð. Hetta er eisini væl longri enn han megnaði fyrstu tvær kappingarnar í ár.

Eyðun royndi seg eisini á 80 m teininum. Tá skotið fór leyp hann avstað, men har kom ein annar drongur inn á geilina hjá Eyðun, sum sostatt ikki fekk pressa heilt. Hann royndi tó sítt besta, og kom á mál við tíðini 15,83 sek, sum hóast umstøðurnar er 0,84 sek skjótari enn hann hevur runnið teinin áður.

Gentur 10-11 ár

Mia Ásadóttir royndi seg á fyrsta sinnið á 80 m teininum, har hon hevði fingið tilluta geil 6. Tá skotið fór spenti Mia í, og so var at kempa, allan vegin um mállinjuna. Her segði tíðin hjá Miu 16,21 sek, sum er ein góðkend debut.

Mia fór síðan til longdarlop, har hon eisini royndi seg á fyrsta sinnið. At hon hevur lop í beinunum sást, tí longu í fyrstu royndini leyp hon heilar 2,83 m. Næsta lopið gjørdist seks centimetrar stytri, og tað síðsta gjørdist somuleiðis eitt vet styttri enn tað fyrsta, men ein flott debut.

Dreingir 10-11 ár

Rói Thomassen var klárur tá longdarlop byrjaði. Hann legði út við at 2,69 m, sum er ájavnt við hansara persónliga met. Hann steðgaði tó ikki har, tí í øðrum umfarið kom hann út á 2,74 m, og í triðja kom hann heilt út á 2,95 m.

Rói fór síðan til startin á 80 m, har hann hevði fingið tilluta geil seks. Rói var kvikur fyrstu fetini, og so var hann uppi í ferð. Hann kempaði væl allan vegin. Hvat úrslitið gjørdist er tó óvist, tí onkursvegna so er hann ikki skrásettur á úrslitalistanum.

Rói fór beina leið til bóltkast, har hann skuldi royna seg við 150 g tungu bóltunum, sum er ”spjótkast” fyri børn. Her var hann tó ikki einasta Hvirla, tí Jógvan Ziska Simonsen royndi seg eisini. Rói legði út við at kasta 17,92 m, meðan Jógvan kom út á 12,01 m. Í øðrum umfarið kom Rói heilt út á 19,92 m, sum er góðan metur longri enn hann hevur kastað áður. Næsta kasti hjá Jógvan endaði uttanfyri og var tí ikki máta, men í triðja smekkaði hann til og kom heilt út á 19,12 m, sum tískil gjørdist hansara longsta. Rói royndi eisini at koma longur út, men hesaferð gjørdust teir 19,92 m frá øðrum umfarið hansara longsta.

Rói endaði dagin við at renna 600 m, sum ikki er tað honum dámar best. Hann er tó fightari, og lá hann allan vegin í tøttum dysti við tveir aðrar. Hesin tætti dystur gjørdi at teir allir hildu eina góða ferð. Tískil gjørdist tíðin hjá Róa so góð sum 2 min 24,25 sek.

Gentur 12-13 ár

Elena Ellindsdóttir Olsen byrjaði við sprint. Hesaferð var teinurin 80 m. Elena hevur tikið seg nógv fram á hinum sprintteinunum í ár, og tí var spennandi, hvussu fór at ganga. Tað sást beinan vegin at hon aftur fór at visa framgongd, tí á málinum segði klokkan 13,27 sek, sum er heili 0,84 sek skjótari enn hon hevur runnið teinin áður.

So fór Elena til 1000 m, sum er longri enn hon hevur runnið áður. Hon hevur tó víst, at hon er kná á longru teinunum, og so var eisini hesaferð. Hon valdi at fylgja við tí fremstu frá byrjan, og lá hon støðugt líka aftanfyri fyrstu 800 metrarnar, so royndi hin at økja um ferðina. Elena fór við, men síðstu 50 metrarnar mátti Elena sleppa. Væl var tó kempa, tí tíðin gjørdist so góð sum 3 min 45,98 sek.

Elena endaði dagin við longdarlop. Her legði hon út við at leypa 3,49 m. Næsta lopið bleiv eitt vet styttri, og somuleiðis triðja og síðsta. Hon endaði sostatt við 3,49 m, sum hennara besta. Tað er 29 centimetrar longri enn hennara persónliga met.

Dreingir 12-13 ár

Aron Mikkelsen byrjaði dagin við at kasta 400 g tunga spjótið. Hann legði út við at kasta heilar 21,65 m. Næsta kasti eydnaðist ikki heilt, men í triðja fekk hann aftur betur flog á, men tað var tó ikki heilt so langt sum tað fyrsta. Av tí at tey 12-13 ára gomlu bara sleppa at royna seg tríggjar ferðir, í mun til fýra ferðir undanfarin ár og seks ferðir í øðrum londum, so fekk Aron ikki høvið, at vita um hann kundi koma longur út hesaferð. Teir 21,65 m hann kastaði í fyrsta umfarið eru tó góðar 9 metrar longri enn hann hevur kastað áður.

Aron royndi seg eisini á 80 m teininum. Her rann hann saman við William á Lava Persson. Teir spentu í tá skotið fór, og so var bara at kempa allan vegin, William á geil 1 og Aron á geil 5. Tíðirnar gjørdust 13,70 sek til Aron, sum harvið bøtti um sína bestu tíð við næstan trimum sekundum, og 15,72 sek til William, sum ikki hevur roynt hendan teinin áður.

Aron endaði dagin á 1000 m teininum. Undan hesum er 400 m tað longsta hann hevur roynt, so hetta var ein stórur biti, men her vísti Aron beinan vegin, at bitin ikki var ov stórur, tí at hann rann væl. Legði út við eini ferð, hann megnaði at halda, og so kempaði hann allan vegin uttan at missa rennilstílin, ella seta ferðina niður. Á málinum segði klokkan 4 min 0,64 sek, sum er flott byrjan á miðteininum.

William endaði sín dag á Tórsbreyt við at leypa longdarlop. Hetta var hansara fyrsta kapping í lop, men tað var ikki til at síggja, tí hann leyp stabilt væl. Í fyrstu royndini kom hann út á 3,36 m. Tað næsta gjørdist eitt sindur styttri, meðan tað triðja vær nærum líka langt sum tað fyrsta. Endaliga úrslitið gjørdist tó 3,36 m frá fyrsta umfarið.

Gentur 14-15 ár

Jóhanna Súnadóttir Pedersen legði út við at renna sín fyrsta 400 m nakrantíð. Stóra avbjóðingin við 400 m er, at leggja út við nóg høgari ferð, uttan ferðin er so høg, at man ikki orkar at halda ferðina. Stóra avbjóðingin hjá Jóhonnu er at fokus í venjing hevur verði at at koma upp í ferð, og toppferð, ikki at halda ferðina, sum er avgerandi á 400 m, sum er longsti sprint teinur. Jóhanna kom væl úr blokkinum, og var skjót uppi at renna í sínum eyðkenda effektiva stíli. Hon helt ferðin væl alla handaru langsíðuna, og inn í seinna svingi. Tá misti hon nakað av ferð, men megnaði at halda rennistílin líka til einir 50 m vóru eftir. Tá var orkan uppi, men viljin gjørdi at ferðin ikki fall meir. Tíðin hjá Jóhonnu gjørdist 68,27 sek, sum er ein stak góð debut.

Jóhanna fór síðan til kúlustoyt, har hon á fyrsta sinnið skuldi royna seg við 3,0 kg tungu kúluni. Her skuldi hon m.a. kappast móti Kristinu Verlandsdóttir Hayfield. Jóhanna byrjaði við at stoyta kúluna út á 5,70 m, meðan Kristina bøtti um sítt persónliga met til 5,96 m. Báðar øktu tær í øðrum, Jóhanna til 5,79 m og Kristina til 6,09 m. Í triðja og seinasta umfarið økti Jóhanna aftur, hesaferð til 5,96 m, sum bara er nakrar centimetrar styttri enn Jóhanna megnaði við tí bara 2,0 kg tungu kúluni í 2019. Tað síðst hjá Jóhonnu gjørdist neyvt líka langt sum tað næstsíðsta.

Jóhanna endaði sín dag við hæddarlop. Hetta er grein hon einans hevur vant einaferð síðan síðsta summar, og tí var tað við spenningi hon fór í gongd. Hon byrjaði á 1,10 m, sum hon kom uppum uttan trupulleikar. Hon kom eisini lætliga uppum 1,15 m. Í fyrstu royndini á 1,20 m kom hon ov tætt uppá stongina. Hon flutti tí startin eitt vet, men tað sást at hon ikki hevði eina stabila atrenning. Hon kom tó uttan trupulleikar uppum í næstu royndini. Á 1,25 m kom hon uppum í fyrstu royndini, og bøtti harvið um sítt persónliga met við 5 centimetrum. So fór yvirliggjarin upp á 1,30 m, men nú sást at atrenningin ikki var nóg stabil, tí hon fekk tað ikki at rigga tá hon kom inn, antin var hon ov nær, ella ov langt vekk. Hesaferð endaði hon sostatt á 1,25 m, men har er nógv at heinta um fokus kemur á at venja hesa grein.

Kristina endaði sín dag við 1500 m. Hon var eitt sindur ósikkur uppá hvat tempo hon skuldi byrja við, tí hon hevur vant væl, og visti tí at hon kundi meir enn hon áður hevur megna, men samstundis vil eitt ov agressivt útlegg kosta í endanum. Hon legði tí varliga út, og fokuseraði uppá rennistílin. Hon hevði eina stabila ferð, men tá 200 m restaðu í økti hon munandi um ferðina. Á málinum segði klokkan 5 min 56,01 sek, sum er góðan hálvan minutt skjótari enn hon hevur runnið teinin áður. Síðstu 200 m vísti hon tó, at har er enn meir at heinta.

Gentur 16-17 ár

Elin Niclasen, sum primert venur spjótkast, royndi seg við 3,0 kg tungu kúluni. Hon legði út við at stoyta kúluna út á 9,65 m. Tað næsta bleiv eitt sindur styttri, men í triðja kom hon á fyrsta sinnið útum 10 m strikuna, tá hon stoytti kúluna út á 10,06 m. Eftir hetta royndi hon at fáa enn meir ferð á beinini, fyri á tann hátt at koma longur út, men hesaferð sat rútman ikki, og tí gjørdust teir 10,06 m tað longsta.

Dreingir 16-17 ár

Miso Buha, sum primert venur trýstøkk, hevur áður runnið væl á 400 m. Hesaferð var spenningur tó størri tá hann byrjaði, tí hann hevur arbeitt nógv við tí tekniska, fyri at optimera kraftútvikling og orkunýtslu. Størsta avleiðingin av teknisku broytingunum er, at hann brúkar baksíðuna av beinunum meir enn hann áður hevur gjørt. Hetta setur krøv til special úthaldni í hesum vøddum, sum tað tekur tíð at upparbeiða. Í dag legði hann út eftir avtalu, og kom upp at renna í nýggja effektiva stílinum, men eftir 200 m sást at orkan at halda henda nýggja stílin ikki er har enn, og tí minkaði ferðin munandi síðstu 200 m. Á málinum segði klokkan 55,58 sek. Har er tó ongin ivi um, tá hann megnar at halda nýggja stílin, so kemur hann niður á heilt aðrar tíðir.

Gentur 18-19 ár

Lýdia Poula Simonsen hevur í longri tíð verði okkara sterkasta kort við 4,0 kg tungu kvinnukúluni, við m.a. heiðursmerki á oyggjaleikunum á Gibraltar. Í seinastuni hevur hon arbeitt nógv við at fáa beinini meir við í stoyti, tí tað er har, at tann heilt stóra kraftin situr. Her hevur gingið støðugt framá. So var tíðanverri ikki í dag, tí timing og rútma sat ikki heilt. Hon byrjaði á 9,61 m, fyri síðan at gera tvey yvirtrakk. So fekk hon tað at sita eitt sindur betur síðstu trý umførðini, men tað longsta hesuferð gjørdist 9,86 m. Hóast tað er nakað frá hennara besta, so er tað tó væl longri enn nøkur onnur føroysk kvinna megnar.

Kvinnur

Guðrið Káradóttir Petersen, sum eigur føroyska metið í hamarkast, og longu hevur klára oyggjaleikakravið í hesi grein, royndi seg sum einasta hvirla í kúlustoyt hjá kvinnunum. Guðrið legði út við at stoyta 4,0 kg tungu kúluna út á 7,70 m. Hetta bøtti hon í triðja umfarið til 7,88 m. Í fimta royndi hon seg við atrenning, og so kom hon út á 7,99 m. Tað síðsta gjørdist eitt vet styttri, soleiðis at hon endaði við 7,99 m.

Menn

Dánjal Dahl Ljósheim og Tórur Mortensen valdu báðir at fokusera uppá 400 m hesaferð. Dánjal venur vanliga 400 m og 800 m, men fokus hevur verði á grund-kondi til 800 m og so ferðina til 400 m, og tí er ein neyvari optimering ikki gjørd, heldur ikki upp til hesa kappingina. Tórur fokuserar primert uppá lop, men av tí at hann áður hevur ogna sær føroysku metini m.a. á 100 m, 200 m og 300, so var avgjørt eftir síðstu kapping at fokus skuldi vera á 400 m, sum er grein hann ikki hevur kappast í síðan 2015. Venjingin hevur givið ábendingar um, at metið kundi náðast. Tað var tí við spenningi at teir báðir fóru í blokkarnar, Torur á geil 3 og Dánjal á geil 4. Tórur var skjótur avstað og legði beinan vegin hinar afturum seg. Hann spenti tó nakað upp, og tí fekk hann ikki eyðkenda flow yvir renningina, og gjørdi tað at ferðin ikki var tað hon hevur verði til venjing. Á hálvum teini lá Dánjal í tøttum dysti um annað plássi, meðan Tórur var væl fremri. Tá teir komu úr svinginum smekkaði Dánjal frá á øðrum plássi, meðan Tórur rann einsamallur væl fremri. Á málinu segði klokkan at Tórur hevði runnið teinin uppá 49,41 sek, sum er 0,87 sek skjótari enn 19 ára gamla føroyska metið. Tíðin hjá Dánjal gjørdist 51,69 sek, sum er neyvt 0,6 sek skjótari enn hansara persónliga met. Eitt bonus hjá Dánjal er at tíðin er skjótari enn kravtiðin til oyggjaleikirnar komandi ár.

Eldru íðkararnir vístu aftur at teir eru í topform

Aðru stórkapping á rað megnaðu allir teir eldru íðkararnir at avrika væl í øllum kappingum teir luttóku í, og í fleiri førum við persónligum metum. Hetta hóast umstøðurnar við vindi og regni, ikki vóru serliga góðar.

Gentur 14-15 ár

Jóhanna Súnadóttir Pedersen royndi seg í longdarlop í bólkinum G14-15 ár. Jóhanna er kvik, og hevur eitt gott avsett, men enn manglar hon at fáa næstsíðsta fetið at sita heilt, og tí leypur hon longd á sama hátt sum fyrsta avsett í trýstøkk, tvs hon kemur høg inn í avsettið, fær mestu ferðina við sær, men megnar ikki at fáa hædd á lopið. Hetta riggaði ikki á Tórsbreyt, men hon er blivin væl kvikari, og tí leyp hon væl longri í øllum lopunum, enn hon hevur gjørt áður. Tað longsta kom í triðja umfarið har hon leyp 4,21 m, sum er 30 centimetrar longri enn hon leyp í januar í ár. Hetta rakk til eitt annaðpláss í kappingini. Har er ongin ivi í, at lopini blív væl longri, tá hon fær teknikkin at sita. Eftir triðja lopið føldi hon eina byrjandi pínu í beininum, og tí var avtala at steðga, tí hetta kundi verði ein komandi skaði.

Jóhanna fór so til spjótkast, har hon saman við Kristinu Verlandsdóttir Hayfield skuldi royna seg við 500 g tungu spjótunum. Hvørgin venur hesa grein, men tað er stuttligt at síggja, hvussu langt grundleggjandi koordinatión røkkur. Jóhanna legði út við at kasta 13,13 m, meðan Kristina byrjaði við at bøta um sítt persónliga met við tveimum metrum til 16,77 m. Jóhanna kastaði eitt vet styttri í teimum báðum næstu kastunum, meðan Kristina legði enn ein metur omaná sítt persónliga met við at kasta 17,74 m í triðja (síðsta) umfarið. Tær gjørdust nummar eitt og tvey í kappingini.

Kristina endaði dagin á 800 m teininum. Eftir at rennistílurin er komin uppá pláss er fokus flutt yvir á ferð og úthaldni, har úthaldni hevur fylt væl meira síðstu vikurnar enn tað hevur gjørt áður. Hetta hevur givið Kristinu eitt yvirskot, sum sást frá tí at skotið fór, tí fyrstu 200 metrarnar fylgdi hon royndu rennarunum, men valdi so at lata teir fara, men helt tó gott tempo allan vegin. Úrslitið gjørdist at hon aftur bøtti um sítt persónliga met, hesaferð við gott 4 sekundum til 2 min 44,15 sek. Hon ognaði sær eitt annaðpláss í kappingini. Til stuttleikar kann nevnast at Kristina hevur bøtt um sítt persónliga met í hvørja tí einastu kapping á miðteini, hon hevur luttikið í.

Gentur 16-17 ár

Elin hevur vant støðugt í vetur. Her hevur fokus mest verði á tað tekniska, har hon hevur flutt seg munandi. Síðstu vikurnar er fokus tí flutt yvir á kraft og ferð. Hetta er nakað, sum ofta gongur útyvir tað tekniska aftur, men leygardagin skuldi tað standa sína roynd. Elin legði út við einum varligum kasti uppá 35,74 m, sum rakk til eitt pláss í talentbólkinum. So setti Elin ferð á, og har sást at kraftin er við at koma, tí hóast tað tekniska ikki riggaði, so endaði spjótið heilt úti á 39,38 m. Triðja kasti var meinlíkt, so var avtala at hon økti um atrenningina. Hetta darvaði eitt sindur í fjórða og fimta, men í sætta fekk hon atrenningina at sita, og aftur var kraftin stór, men avleveringin sat ikki, og tí bleiv flogið ov lágt. Úrslitið gjørdist tó, at Elin á fyrsta sinnið kom útum 40 m strikuna. Við einari optimalari avlevering eru nógvir metrar eftir at heinta. Elin vann kappingina trygt.

Dreingir 16-17 ár

Miso Buha byrjaði dagin við at renna 200 m. Her var hann so heppin at renna í sama riðli sum 18-19 ára gomlu dreingirnir og mennirnir. Miso hevur arbeitt nógv við at fáa loyst upp í rørslunum, og er hetta við at rigga í venjing, men kapping er nakað heilt annað. Hann var eisni í so læstur tá starturin fór, men hann fann leysara rennistílin, og fekk hála seg fram á eitt annaðpláss í riðlinum. Tíðin gjørdist 24,07 sek, sum er 0,23 sek skjótari enn hann hevur runnið teinin áður. Hetta var eisini næstskjótasta tíð á degnum, har bara vinnarin hjá monnum rann skjótari.

Miso, sum primert venur trýstøkk, royndi seg eisini í longdarlopi, har hann partvís hevur arbeitt við at seta fótin rætt í til næstsíðsta fet og so “bíða” á plankanum, heldur enn at smekka fótin niður á plankan. Hetta gongur spakuliga framá, men í kappingini var hann ov agressivur og tískil fekk hann eina góða hædd, men misti ov nógva ferð og harvið longd. Hann kom tó út á 5,52 m í triðja umfarið. Hetta var ein longd sum bara vinnararnir í eldru bólkunum (Dreingir 18-19 og menn) megnaðu at gera betur á degnum.

G18-10

Lýdia Poula Simonsen hevur við heiðursmerkjum á danska meistaraheitinum fyri ung í kúlustoyt verðuliga sett seg á hesa grein her heima, men hesaferð var spjótkast á skránni, sum ikki er tað henni dámar best. Hon byrjaði við einum miseydnaðum kasti men so kom ferð á, tí í øðrum kastaði hon 600 g tunga spjótið út á 19,74 m. Hon økti í fjórða umfari 20,42 m og í fimta til 22,82 m. Hetta tryggjaði henni eitt fyrstapláss í kappingini.

Kvinnur

Guðrið, sum eigur føroyska metið í hamarkast, royndi seg 600 g tunga spjótinum. Hon legði út við einum miseydnaðum kasti, men í øðrum umfarið kom hon út á 22,72 m. Hon økti til 22,84 m í triðja umfarið og síðan til 23,81 m í fimta umfarið, sum gjørdist hennara longsta. Hetta rakk til eitt annaðpláss í kappingini.

Menn

Fyrsta greinin hjá monnunum var 200 m har Tórur Mortensen og Dánjal Dahl Ljósheim høvdu melda til. Tórur eigur føroyska meti uttandura, og venjing hevur givið ábendingar um at hann er klárur at bøta um føroyska meti, men av tí at tað bara vóru 15 min millum startin á 200 m og startin í longdarlop, so mátti Tórur velja, hvat hann skuldi satsa uppá, og fall hetta val á longdarlop.

Dánjal venur mest 400 m og 800 m, men hann vísti í vetur at hann er skjótur við at taka føroyska metið innandura á 200 m teininum. Í sprint hevur Dánjal havt til vana at vera ov lágur tá hann kemur úr blokkinum. Hetta riggaði betur í dag, har hann kom avstað í rætta vinkli, og tískil fekk eitt munandi  betur drive fyrstu metrarnar enn hann er vanur við. Tá hann var komin upp í ferð er hann ikki til at steðga, og hann økti til allar hinar allan vegin á mál, har tíðin segði 23,33 sek, sum er neyvt 1 sek skjótari enn hann rann teinin í 2019 og bara 0,03 sek frá oyggjaleikakravinum.

Tórur, sum er við at koma upp í ferð eftir treiskan skaða, royndi seg í síni fyrstu longdarlop kapping í tvey ár. Longu í fyrsta lopið (video) sást at hann er við aftur, tí við at leypa 6,65 m kom hann langt útum oyggjaleikakravið, hóast hann var varðin í atrenningini og tískil ikki fekk nøktandi ferð við sær inn í lopið. Fokus var tí at leggja meir trýst á fyrstu fetini í atrenningini. Hetta gav meir ferð, og í triðja økti hann til 6,74 m, og í sætta umfarið kom hann so út á 6,90 m, sum nógv tað longsta lopið her heima í nógv ár, og bara er 20 centimetrar frá føroyska metinum.

Síðsti luttakari í eldin var Dánjal Dahl Ljósheim, sum skuldi royna seg á 800 m teininum. Dánjal hevur vant munandi fleiri kilometrar enn hann er vanur við í vetur, men enn manglar at fáa yvirsett hetta til special-úthaldni á 800 m. Hesum arbeiðir hann tó við, og sást tað tá hann legði út við at renna stabilt smá 30 sek pr 200 m fyrstu 600 m. So var orkan tíðanverri uppi, og misti hann nógv síðstu 200 m, sum hann rann uppá næstan 36 sek. Endaliga tíðin gjørdist 2 min 05,40 sek, sum er uml 2 sek skjótari enn hann hevur runnið teinin áður í Føroyum. Hann vann kappingina trygt.

Góð úrslit hjá yngru hvirlunum á Tórsbreyt

Annað umfar at stórkapping fyri børn og ung fór fram í regninum á Tórsbreyt leygardagin. Har var nakað av vindi og rættuliga nógv regn meðan kappast var, og darvaði hetta nakað, men ungu hvirlurnar vístu at tær bæði dáma og duga at kappast, tí øll fóru tey heim við persónligum metum.

U8 – Dreingir

Yngsta hvirlan hesaferð var Lui E. Olsen, sum fekk høvi at royna seg á 40  m teininum.  40 m er stytsti sprint teinur, og tí eitt gott stað at royna ferðina. Lui, sum rann á geil 2, var eisini skjótur avstað tá skotið fór, og kempaði væl allan vegin. Hetta sást aftur á tíðini, sum segði at hann rann teinin uppá 11,41 sek.

Gentur 8-9 ár

Helena í Skorini vísti á 40 m, sum var hennara fyrsta kapping á degnum, at hon er blivin væl skjótari enn hon hevur verið. Hon rann teinin meir enn ½ sek skjótari enn hon hevur gjørt áður, tá hon á geil 1 í riðili eitt rann teinin uppá 8,11 sek.

Helena helt beint áfram til longdarlop, har hon longu í fyrstu royndini legði 21 centimetrar omaná sítt besta. Hon økti við 4 sentimetrum í øðrum umfarið, fyri at leypa heila 2,73 m í triðja umfarið og tók harvið fyrsta plássið. Lopið var heilar 40 sentimetrar longri enn hon hevði lopið undan kappingini.

At Helena dugir at kappast sást aftur í kúlustoyt, tí aftur økti hon um longdina fyri hvørt umfar, tá hon byrjaði við at stoyta 2,0 kg tungu kúluna út á 3,00 m. Í øðrum umfarið kom hon út á 3,10 m og í triðja út á 3,55 m.

Dagurin endaði við miðteinarenning, og har var Helena aftur við. Hetta var hennara fyrsta kapping á 600 m teininum, men tað var ikki til at síggja, tí hon lá í tættari kapping við tríggjar aðrar allan vegin. Tíðin gjørdist so góð sum 2 min 37,72 sek.

Dreingir 8-9 ár

Kristjan Róksson og Eyðun E. Olsen byrjaðu dagin við at renna 40 m. Teir runnu lið um lið í fyrra riðili; Kristjan var á geil 3 og Eyðun á geil 4. Báðir spentu teir í, og báðir fingu teir góða løn fyri avrikið, tí við tíðini 7,62 sek rann Kristjan 0,32 sek skjótari enn hann hevur gjørt áður, meðan Eyðun við tíðini 8,21 sek rann 0,29 sek skjótari enn hann hevur gjørt áður. Ein flott framgongd hjá báðum!

Kristjan royndi seg eisini á 600 m, sum er 1½ umgangur á Tórsbreyt. Hetta var hansara fyrsta roynd á hesum teininum, men tað var ikki til at síggja, tí hann legði bragdliga fyri, og hóast ferðin fall eitt vet, so megnaði hann at halda hinar væl aftanfyri. Tíðin gjørdist so flott sum 2 min 12,88 sek.

Bæði Kristjan og Eyðun endaðu dagin við at leypa longdarlop. Kristjan legði hart út við at leypa 2,93 m, meðan fyrsta lopið hjá Eyðun miseydnaðist. Eyðun fekk tað at rigga betur í næsta og kom hann út á 2,53 m. Báðir royndu at koma longur út, men hesaferð komu teir ikki longri út. Teir 2,93 m hjá Kristjan er 23 centimetrar longri enn hann hevur lopið áður.

Gentur 10-11 ár

Hjá teimum 10-11 ára gomlu gentunum sóu vit á fyrsta sinnið Miu Ásadóttir royna seg í kapping. At byrja sína sprint-karrieru við 200 m er ikki sum at siga tað, men hon rann flott, tí eftir ein góðan start kempaði hon allan vegin, og á málinum segði klokkan at tað bara hevði tikið Miu 43,82 sek at renna teinin.

Dreingir 10-11 ár

Dánjal Olsen royndi seg á fyrsta sinnið í kapping. Her skuldi hann, eins og Mia, byrja sítt sprint við at renna 200 m. Hann legði hart út á geil 1, og kempaði væl. Tað var ikki til at síggja at hetta var debut, tí hann megnaði at renna teinin uppá bara 37,34 sek.

Í kúlustoyt, har Dánjal royndi seg við 2,0 kg tungu kúluni, miseydnaðist fyrsta royndin, men í næstu kom hann út á 4,50 m. Hann økti í triðja umfarið til 5,85 m, sum sostatt gjørdist tað endaliga úrsliti hjá honum.

Gentur 12-13 ár

Elena E. Olsen byrjaði dagin við at renna 200 m, har hon var á næst uttastu geil (geil 5). Hetta er teinur hon hevur runnið áður, og aftur í ár vísti hon stóra framgongd, tí eftir at hava lagt í so varliga út, kempaði hon seg fram síðstu 100 m, við tí úrslitið at hon rann teinin næstan 2 sek skjótari enn hon hevur gjørt áður. Tíðin gjørdist 34,77 sek.

So fór Elena til hæddarlop. Hetta er kapping har tað ikki hevur gingið heilt eftir vild áður, men tað var eyðsýnt at hon hevði avgjørt at nú skuldi tað verða. Hon var tó óheppin í fyrsta lopinum og gleið á hálu breytini. Hon kom tó sterkt aftur og leyp í øðrum umfarið uppum 90 cm. Á 95 og 100 cm tørvaði henni bara eina roynd at koma uppum. So fór yvirliggjarin upp á 105 cm. Her hevði hon onkra góða roynd, men yvirliggjarin datt, og tískil endaði Elena við at leypa 100 cm.

Eyðkenni tá Elena rennur miðtein er, at hon dugir sera væl at disponera orkuna. Hon leggur varliga út, og heldur so ferðina allan vegin. Hetta gjørdi hon aftur hesaferð, og har var ongin slingur í valsinum, tí við stabilu ferðini legði hon støðugt tær hon kappaðist ímóti, afturum seg. Á málinum segði tíðin 2 min 57,73 sek, sum er 12½ sek skjótari enn hon hevur runnið teinin áður.

Dreingir 12-13 ár

Aron Mikkelsen er við at gera kúlustoyt til sína grein, tí longu í fyrsta umfarið stoytti hann 3,00 kg tungu kúluna heilt út á 7,45 m, sum er 3½ m longur enn hann hevur stoytt hesa kúlu áður. Hann steðgaði tó ikki har, tí hann økti til 7,70 m í øðrum umfarið og heilt út á 8,20 m í triðja umfarið, sum merkti at hann ognaði sær eitt trygt fyrstapláss í kappingini.