Posted on

Góður dagur á Tórsbreyt

Fleiri hvirlur høvdu valt at royna seg á fyrra degnum av ársins FM fyri ung.

Dreingir 8-9 ár

Hjá teimum yngstu dreingjunum byrjaði Eyðun Ellindsson Olsen dagin við at renna 60 m, har hann hevði fingið tilluta geil 2. Eyðun, sum venur á “týsdagsliðinum”, er ein góður fightari, og aftur vísti hann at hann megnaði at kempa. Hann rann eina góða kapping og við tíðini 11,47 sek skar hann 1,42 sek av sínum persónliga meti.

Eyðun fór síðan til longdarlop. Her legði hann út vit at leypa 2,71 m, sum bara er 4 centimetrar frá hansara persónliga meti. Næsta lopið misteydnaðist, men í triðja riggaði betur. Hann kom to ikki longri enn í fyrsta, og tískil gjørdust tær 2,71 m frá fyrsta umfarið hansara besta hesaferð.

Dreingir 10-11 ár

Dánjal Olsen legði út við at kasta 145 g tunga bóltin, sum mest líkist eini gular golfkúlu. Hetta er grein, hann ikki hevur kappast í áður, men at hann lærir skjótt sást tí eftir at hava kasta 23,68 m í fyrsta umfarið legði hann 5 m afturat í øðrum og aftur 2 metrar í triðja, soleiðis at hann endaði við at kasta 30,34 m, sum hann fekk eitt silvurmerkið fyri.

Næsta kappingin hjá Dánjal var longdarlop. Aftur hesaferð var hetta hansara fyrsta kapping í greinini. Hann legði tó hart út, tí at lopið bleiv máta til heili 2,98 cm. Í næsta lopið var hann eitt sindur varin, men fekk góða hædd á. Lopið bleiv máta til 2,94 m. Í triðja og síðsta lopið hevði hann góða ferð, men her fekk hann ikki hædd á. Longdi gjørdist tí aftur 2,94 m, men hann ognaði sær eitt broncumerkið við teimum 2,98 m hann leyp í fyrsta umfarið.

Gentur 12-13 ár

Elena Ellindsdóttir Olsen byrjaði dagin við at renna 80 m innleiðandi. Elena hevur í seinastuni arbeitt við at optimera sprint-positiónina, tvs hvussu kropsburðurin er í ymsu fasunum av sprint og at fáa meir kraft í fyrstu fetini. Elena var í fyrra riðlinum, har hon hevði fingið tilluta geil 2. Tá skotið fór vísti Elena at har er komin meir kraft í fyrstu fetini, tí hóast hon ikki brúkti start blokk, so var hon ein av teimum skjótaru avstað. Sprint-positiónin sat ikki, men sterki viljin gjørdi at hon við tíðini 12,97 sek rann seg til eitt pláss í finaluni, sum er í morgin (sunnudagin). Tíðin er 0,3 sek skjótari enn hon hevur runnið teinin áður.

Næsta kappingin hjá Elenu var hæddarlop. Her legði hon út við at taka yvirliggjarin niður við í fyrstu royndini á 95 cm. Ein lítil justering gjørdi, at hon kom trygt uppum í næstu royndini. Hon kom somuleiðis trygt uppum í fyrstu royndini á 100 cm, og tangeraði harvið sítt persónliga met. So fór yvirliggjarin upp á 105 cm. Her miseydnaðist fyrsta royndin, men í næstu royndini kom hon eisini uppum hesa hæddin og legði sostatt 5 cm afturat sínum persónliga meti. Hetta bleiv eisini endaliga úrsliti hjá henni.

Síðsta einstaklingakappingin hjá Elenu var 600 m, sum henni dámar stak væl. Her valdi hon at leggja varliga út og eftir fyrstu 200 m lá hon nakað aftanfyri tað fremstu, hon økti tá eitt sindur um ferðina og eftir 400 m lá hon ájavnt við tað fremstu. So økti hon aftur, og harvið legði hon avstand millum seg og hinar allan vegin til mállinjuna. Á málinum segði tíðin 2 min 4,53 sek, sum er 10 sek skjótari enn hon hevur runnið teinin áður. Fyri avrikið fekk hon gullmerkið.

Gentur 14-15 ár

Kristina Verlandsdóttir Hayfeld og Jóhanna Súnadóttir Pedersen byrjaðu sítt FMU við at kasta 0,75 kg tunga diskin. Hvørgin venur diskuskast, men tað er altíð stuttligt at royna aðrar greinar enn tann man venur. Kristina byrjaði við at kasta 12,20 m. Jóhanna byrjaði varliga, men í øðrum umfarið kom hon út á 12,06 m, sum er persónligt met við lítlum ½ metri. Kristina økti í øðrum til 13,08 og í triðja til 14,90 m, sum er persónligt met við 16 cm. Kristina kom ikki longri, men í fjórða og síðsta umfarið (í Føroyum sleppa yngru bólkarnir ikki at royna seg í heilari kapping) kastaði hon 12,99 m og endaði sostatt við at leggja 1,22 m omaná sítt persónliga met. Tær báðar endaðu sum nummar eitt og tvey.

Næsta kappingin hjá Kristinu var 800 m, sum er teinur henni dámar sera væl. Kristina hevur arbeitt nógv við at betra um úthaldni, men valdi tó at leggja varliga út í mótvindinum. Hon helt eina støðuga ferð, har stílurin var góður. Tá 200 m vóru eftir økti hon munandi um ferðina. Hetta gjørdi at tíðin á málinum segði 2 min 46,58 sek, sum bara er 1,44 sek frá hennara persónliga metið. Hon fekk silvurmerkið fyri avrikið.

Síðsta kappingin áðrenn boðrenningina var spjótkast, har bæði Jóhanna og Kristina royndu seg. Her legði Kristina út við at kasta 14,18 m. Jóhanna svaraði aftur við at kasta 16,14 m, sum er 1,63 m longri enn hon hevur kastað spjótið áður. Kristina var tó skjót, tí í øðrum umfarið kom hon út á 19,92 m, sum er 2,18 m longri enn hon hevur kastað spjótið áður. Báðar løgdu tær nógv fyri í royndini at koma longur út, men hesaferð komu tær ikki longri út. Tær fingu ávikavist gull og silvur fyri avrikið

Gentur 18-19 ár

Lýdia Poula Simonsen legði út við at kasta 1,0 kg tunga diskin, har hon eigur føroyska metið. Avtala var at hon royndi at fáa meir dynamikk inn í kastið við at fokusera uppá at sprinta fram og at fáa vinstra skjótt niður til blokk. Hetta er ikki nakað hon hevur arbeitt við, og tí miseydnaðust fyrstu kastini, men í fjórða fekk hon rørslurnar at sita og lendi diskurin á 24,71 m. í fimta kom meir ferð á beinini og kom diskurin útum 30 m strikuna. Tað bleiv mátað til 31,00 m. Tað síðsta miseydnaðist, men Lýdia fór heim við gullinum fyri teir 31 m í fimta umfarið.

Næsta kappingin hjá Lýdiu var spjótkast, har Sunniva Bogadóttir eisini royndi seg. Hetta er grein har Sunniva er í einum serflokki her heima og fyri tann skuld í Danmark eisini, tí hon hevur umboðað Danmark í landsdysti. Sunniva valdi tó at taka tað róligt hesaferð, tí hon skuldi spæla finalu í hondbólti um lionsbikari beint eftir kappingina. í fyrsta kasti kom hon alt ov nær strikuni og kastaði tí nærum standandi. Tær 32,09 m var tó nóg mikið til at vinna kappingina. hon royndi eitt kast afturat, men tað bleiv eitt vet styttri. Lýdia, sum ikki plagar at kasta spjót, legði út við at kasta 22,60 m. í øðrum umfarið kom hon út á 24,43 m, sum er 33 centimetrar longri enn hennara persónliga met. Næstu kastini vóru øll omanfyri 20 m, men hon kom tó ikki útum teir 24,43 m hon kastaði í øðrum umfarið. Tær báðar fingu ávikavist gull og broncu fyri avriki.

Boðrenning

Kristina og Jóhann megnaðu at savna eitt lið til 4×100 m við at biðja Elenu, sum annars er partur av yngra bólkinum og so einari úr Bragdinum. Hesar, sum vóru 12-15 ár skuldu royna seg móti 18-19 ára liðum við 18-19 ára gomlum gentum. Elena rann fyrsta túr, og misti hon eitt vet til hinar. Eftir eitt sera trygt skifti rann Jóhanna nakað inn á hinar og avleveraði í einum skifti, sum var líka við at miseydnast til Kristinu, sum rann seinna sving. Kristina avleveraði síðan til gentuna úr Bragdinum sum rann heim. Tær vunnu sær broncumerkið fyri avrikið.

Posted on

Gott FM hjá Hvirluni

Aftur í dag stóðu hvirlurnar fyri nógvum sera góðum úrslitum soleiðis at samlaða úrtøkan gjørdist 10 gull, 7 silvur og 6 bronsumerkið umframt at heilar fimm hvirlur kláraðu oyggjaleikakrav (Guðrið: hamarkast, Sunniva: spjótkast, Lýdia: kúlustoyt, Elin: spjótkast og Dánjal: 200 m).

Spjótkast, menn (Rógvi Højgaard)

Fyrsta kappingin var tá menninir royndu seg við 800 g tungu spjótunum. Her var veteranurin Rógvi Højgaard, sum vann bronsumerki á oyggjaleikunum á Bermuda, við. Rógvi er givin av venja, men hann vísti longu í fyrsta kasti at hann dugur enn. Hann kom væl inn og fekk konvertera ferðina til forspenni í kroppinum, sum bleiv útloyst til eitt kast uppá 42,55 m. Hann kom tó í so tætt uppá at gera yvirtrakk, og tí helt hann aftur í avleveringini. Eftir at hava lopið næsta kasti um, royndi hann aftur. Hann byrjaði longur vekk, og nú sat betur, hann fekk aftur tað tekniska at sita, men hesaferð førdi hann kasti ígjøgnum. Úrslitið gjørdist 43,98 m, sum rakk til eitt gullmerkið.

200 m, kvinnur (Meiken Salberg Olsen)

Aftur í dag var tað Meiken sum umboðaði Hvirluna í sprint. Hesaferð var hon á geil 5 í riðli tvey tá runnið var um eitt pláss í finaluni. Starturin var í byrjanini av svinginum, og hetta hevur Meiken ikki vant. Tað sást tó ikki, tí hon kom væl avstað, og var skjót upp í ferð. Hon kempaði væl í svinginum og helt ferðina tá hon kom úr svinginum. Á langsíðuni var uppgávan at halda ferðina, og hetta megnaði hon væl, tí á málinum segði tíðin 39,35 sek, sum er 1,13 sekund skjótari enn síðst hon rann teinin.

Spjótkast, kvinnur (Sunniva Bogadóttir, Elin Niclasen, Guðrið Káradóttir Petersen)

Tá kvinnurnar hitaðu upp við 600 g tungu spjótunum var tíð at seta seg at njóta kappingina, tí her vóru tvær við, sum báðar hava víst sera høgt støði við spjótinum. Elin er tó enn so mikið ung at hon til dagligt kappast við 500 g tunga spjótinum, meðan Sunniva, sum fyrr í ár var uttanfyri 40 m strikuna, er við at koma fyri seg aftur eftir ein skaða í albogan, og skuldi royna seg í síni fyrstu kapping síðan FM í 2019. Tað var Sunniva, sum byrjaði kappingina við einum braki, tí longu í fyrsta umfarið kastaði hon spjóti út á 38,14 m, sum bara er 32 cm frá føroyska metinum hon setti á FM í fjør. Elin fylgdi við og kastaði 35,74 m, sum er 4 centimetrar styttri enn hon kastaði á FM í fjør. Annað umfarð broytti onki, men í triðja stytti Elin um munin við at kasta 36,38 m, sum er persónligt met. Báðar royndu tær at koma longri, men støðan var tann sama til síðsta umfarð, tá Elin fekk meir íntensitet í atrenningina, og fekk hetta flutt yvir í spjótið sum meir ferð. Tað sást at tað var nær við, men tó ikki heilt har. Kasti bleiv máta til 37,61 m. Sunniva fór sostatt við gullinum, 53 centimetrar frammanfyri Elin, meðan Guðrið á fimta plássi kastaði 24,59 m. Sunniva kláraði, sum tann sætta Hvirlan higartil, kravið til oyggjaleikirnar, meðan Elin sum áður hevur klára tað, enn einaferð var omanfyri kravið.

1500 m kvinnur (Kristina Verlandsdóttir Hayfield)

Kristina hevur víst støðuga framgongd í flestu greinum, og hava venjingartíðir eisini víst at hetta ikki kemur av ongum. Hetta hevði hon við sær tá 1500 m fóru í gongd. Her legði hon eitt sindur varligari út enn hon gjørdi á 800 m fyrra dagin av FM. Fokus var at halda ein lættan stíl og so annars halda eina støðuga ferð. Hetta megnaði hon væl. Tá 200 m vóru eftir setti hon ein spurt inn og økti ferðina munandi inn móti málinum. Á málinum segði tíðin 4 min 49,46 serk, sum er 6½ sek skjótari enn hon hevur runnið teinin áður. Fyri hetta ognaði hon sær eitt bronsumerki.

200 m menn (Dánjal Dahl Ljósheim, Miso Buha)

Dánjal og Miso høvdu báðir givið avboð til aðrar greinar fyri at fokusera uppá 200 m, so tað var ikki uttan spenning at teir gjørdu seg klárar. Miso á geil 2 og Dánjal á Geil 3. Tá skotið fór var Dánjal skjótur avstað, meðan Miso ikki fekk ferðina upp fyrstu fetini. Eftir teir fyrstu 30 m var ferðin hjá Miso komin upp, og úr svingini vóru nakrir fáir metrar millum teir, Dánjal fremst og Miso á einum triðja plássi. Miso megnaði best at halda ferðina síðstu 100 metrarnar, men Dánjal megnaði at halda leiðsluna og vann við tíðini 23,28 sek meðan tíðin hjá Miso á øðrum plássi gjørdist 23,35 sek. Tíðin hjá Dánjal er undir kravtíðina til oyggjaleikir, og sostatt hevur Dánjal nú klára kravið á bæði 200 m og 400 m teininum, meðan Miso, sum skar 0,95 sek av sínum persónliga met og samstundis tók bólkametið, bara manglaði 0,05 sek í at klára kravið.

Kúlustoyt kvinnur (Lýdia Poula Simonsen, Elin Niclasen, Guðrið Káradóttir Petersen)

Í kúlustoyt var ikki tann stóri spenningurin um gullið, tí Lýdia er tað fremri enn hinar. Í seinastuni hevur tað ikki rigga heilt hjá Lýdiu, og tí var fokus í hesi kappingini at fáa stabilisera nøkur teknisk element sum hon hevur arbeitt við. Fyrstu royndirnar vóru eitt sindur varnar, men tað, hon hevur arbeitt við sá út til at halda. Í fjórðu royndini setti hon so meir ferð á og tá kom hon út á 10,69 m. Síðsta royndin var eitt vet styttri. Har var ein tøtt kapping um silvurmerki millum Elin og Guðrið, har Elin endaði við at draga longra stráði við 8,45 m, meðan Guðrið fór við bronsuni við 7,90 m. Lýdia kom aftur útum oyggjaleikakravið.

Kúlustoyt, menn (Dánjal Dahl Ljósheim)

Hjá monnunum var Dánjal tann einasta Hvirlan sum royndi seg. Kúlustoyt er ikki ein grein hann venur, so tilgongdin var at halda tað einkult. Hetta riggaði væl, tí tá hann í øðrum umfarið kom út á 8,89 m var kappingin í verðuleikanum avgjørd. Hann økti tó vil 8,93 m í fjórða, sum gjørdist hansara  longsta hesaferð. Harvið ognaði hann sær gulli aftur í ár, og við neyvt somu longd sum í fjør.

Boðrenningar vóru at enda, og her høvdu Dánjal og Miso sligið seg saman við tveimum rennarum úr Treysti. Liðið hjá teimum ognaði sær silvurmerki.

Fleiri myndir eru í myndasavninum.

Posted on

5 Gull, 4 silvur og 4 bronsu fyrsta dagin á stóra FM

Føroyska meistaraheitið fyri vaksin á breyt er hæddarpunktið innan frælsu ítróttina og aftur í ár vóru nógvar hvirlur klárar tá ymsu kappingarnar fóru í gongd.

400 m rimarenning, menn

Fyrsti starturin var 400 m rimarenning, har Dánjal royndi seg. Dánjal eigur sjálvur føroyska metið, men hóast vindin var málið at skera eitt sindur av føroyska metinum. Dánjal kom væl av stað, og hevði ferðina væl við sær yvir fyrstu rimarnar. Hann helt rútmuna inntil áttandu rim, har hann lendi eitt sindur skeivt, og misti ferðina heilt. Hann økti so ferðina aftur, men rútman var farin, og inn til bæði næstsíðstu og síðstu rim trippaði hann (tók fleir stutt/títt fet), og misti enn meir tíð. Hóast hetta so segði tíðin á málinum 61,03 sek, sum bara er 0,47 sek frá føroyska metinum. Hann fekk gull fyri avrikið.

Longdarlop, menn

Meðan Dánjal rann fór longarlop hjá monnum í gongd. Her var Miso Buha, sum annars primert venur trýstøkk, klárur at royna seg. Miso hevur í seinastuni funnið eitt eyka gear í sprintum, og tí var tað við spenningi at hann fór í gongd. Tað vísti seg tó beinan vegin at hetta fór ikki at vera hansara dagur, tí hann fann ikki ferðina í atrenningini, og kompenceraði tí við at royna ov nógv. Hetta breyt leysu rútmuna, sum er grundarlagi undir einum góðum lopi. Endaliga úrslitið gjørdist 5,19 m, sum hann leyp í fyrsta umfarið. Hetta rakk til eitt bronsumerki.

Hamarkast, kvinnur og menn

Hamarkast fyri bæði menn og kvinnur var í gongd. Her royndu Guðrið Káradóttir Petersen, Lýdia Poula Simonsen og Elin Niclasen seg. Hóast fyrsta kasti hjá Guðrið fór í netið, so var ongantíð ivi um hvørt hon fór at vinna, tí hennara kast lógu øll uttanfyri 40 m strikuna. Hon var tó ikki heilt nøgd við hetta, tí kastini lógu so nær hennara føroyska metið. Í triðja umfarið kom hon heilt út á 42,69 m, sum bara er 20 centimetrar frá føroyska metinum. Í Síðsta umfarið fekk hon tað at sita, tí hóast hon helt aftur í avleveringini fyri ikki at gera yvirtrakk, so lendi hamarin heilt úti á 43,41 m, sum er nýtt føroyskt met. Lýdia og Elin dystaðust um silvurmerkið, og her legði Lýdia seg framum Elin, sum royndi seg á fyrsta sinnið við 4 kg hamaranum. Lýdia ognaði sær tó silvurmerkið við 21,59 m. Elin legði varliga út við at kasta 15,16 m, men so økti hon við einum lítlum metri í hvørjum kasti. Teir 19,70 m hon kastaði í síðsta umfarið rukku til eitt bronsumerki. Hjá monnunum vann Heri Ziska við einum kasti uppá 33,60 m.

100 m, kvinnur

Av tí at tað vóru so nógvir luttakarar hjá kvinnunum á 100 m, so byrjaði Meiken Salberg Olsen við at renna í fyrsta innleiðandi riðlinum á 100 m. Meiken hevur arbeitt við at fáa meir effektiva acceleratión og at fáa toppferðina upp. Her hevur gingið framá, og hevur hetta m.a. merkt at hon í seinastuni støðugt hevur bøtt um sínar venjingartíðir á styttru teinunum. Enn er hon tó ikki byrja at arbeiða miðvíst við at megna at halda ferðina, og tí var spennandi at síggja, hvussu hon fór at megna at umseta nýggju ferðina til ein góðan 100 m. Meiken kom væl frá start, og hon megnaði at halda høga trýsti fyrru helvt, men móti endanum sást at hon ikki hevði vant sprint-úthaldni, og tí minkaði ferðin nakað. Við tíðini 18,40 sek (w: -0.3 m/s) rann hon eina av sínum skjótastu tíðum. Úrslitini rakk ikki til eitt pláss í finaluni hesaferð. Tá sprintúthaldni kemur við í venjingina er lítil ivi um at hon kemur at flyta seg munandi á 100 m og ikki minni á 200 m, sum hon skal renna í morgin.

800 m, kvinnur

So átti Kristina Verlandsdóttir Hayfield tørn. Kristina, sum nústani í 2020 hevur aldur at kappast á FM royndi seg á 800 m. Kristina hevur í seinastuni vant væl, men vindurin á Tórsbreyt fór vantandi at blíva ein avbjóðing í mun til at seta met. Kristina valdi tó at leggja agresivt út, og eftir fyrstu 400 m lá hon væl fremri enn hennara persónliga met. Harða útleggi kostaði tó, og serliga síðstu 200 m misti hon væl av ferð, men hóast hetta, so megnaði hon at renna teinin uppá 2 min 45,23 sum, sum bara er uml eitt sek frá hennara bestu tíð. Hon gjørdist nummar fýra í kappingini.

5000 m, kvinnur

Á longsta teininum 5000 m, royndi Rigmor Napleonsdóttir Arge seg. Rigmor, sum primert er kend fyri at at renna væl á Marathon og ½Marathon teinum, hevði valt at royna seg á einum fyri hana sera stuttum teini, sum setur heilt onnur krøv enn longru teinarnir. Tað sást beinan vegin at hon hevur vant til hetta, tí rennstílurin var væl meir kraftmikil enn hann plagar at vera. Ein slík broyting í stíl kostar tó í byrjanini, og var hetta uttan iva orsøkin til at hon ikki megnaði at halda somu støðugu ferð, sum hon annars er kend fyri. Hon kom tó á mál við tíðini 20 min 49,43 sek, sum er góðan minutt seinni enn hennara persónliga met, sum hon setti á FM í 2019. Hon fekk silvurmerkið fyri avrikið.

Diskuskast, kvinnur og menn

So var kast aftur á skránni. Guðrið, Lýdia og Elin royndu seg við 1,0 kg tunga diskinum. Her løgdu bæði Guðrið og Lýdia hart út. Guðrið kastaði diskin út á 28,39 m, sum er smáar tveir metrar longri enn hon hevur kastað áður. Lýdia svaraði við at kasta diskin út á 32,22 m, sum er góðan metur styttri enn hennara persónliga met. Hon legði tó ein lítlan metur omaná í øðrum umfarið, har kasti bleiv mátað til 33,12 m, sum bara er 32 cm frá hennara føroyska metið. Næstu køstini royndu báðar ov nógv, og tí spentu tær upp og tískil komu tær ikki longri út hesaferð. Elin, sum fyrr í ár kastaði út móti somu longdum, fekk tað ikki at rigga hesaferð, og endaði hon við bronsumerkinum fyri eitt kast uppá 21,29 m. Hjá monnunum vann Heri Ziska tá hann kastaði 2,0 kg tunga diskin út á 28,84 m.

100 m, menn

So var 100 m finalan á skrá. Her vóru Dánjal og Miso báðir við. Dánjal hevur fingið effektivari sprintstíl við at broyta positiónina av mjødnini, meðan Miso hevur funnið eitt eyka gear við at lata upp í rørslunum hjá sær. Venjingartíðir hjá báðum hava bent á at teir kundu bøta munandi um síni persónligu met. Báðir komu væl úr blokkinum, Miso spenti eitt sindur upp, men megnaði so at lata upp fyri stóru rørslunum. Tað sást at teir høvdu vant sprint-úthaldni tí báðir megnaðu teir halda ein góðan sprint stíl allan vegin. Á málinum segði tíðin hjá Dánjal 11,71 sek, sum er 0,45 sek undir hansara persónliga met, meðan tíðin hjá Miso segði 11,79 sek, sum er 0,19 sek undir hansara persónliga met, sum hann longu hevði skorði 0,16 sek av fyri 2 vikum síðan. At teir megnaðu hetta hóast ein mótvind uppá 1,3 m/s vísur, at har er enn meir at heinta. Teir blivu ávikavist nr 2 og 3 í kappingin.

4×100 m, kvinnur

Í boðrenningin hevði Hvirlan onki lið, men Kristina var headhunta til eitt blanda lið saman við trimum kvinnum úr Bragdinum, har hon skuldi renna langa teinin, sum annar túrur ofta verður nevndur, tí tað tykist longri at renna handaru langsíðu enn sving ella síðstu 100 m á mál. Kristina rann, sum altíð væl, og var við til at vinna eitt bronsumerkið við liðinum.

Fleiri myndir eru at finna í myndasavninum.