Eldru íðkararnir vístu aftur at teir eru í topform

Aðru stórkapping á rað megnaðu allir teir eldru íðkararnir at avrika væl í øllum kappingum teir luttóku í, og í fleiri førum við persónligum metum. Hetta hóast umstøðurnar við vindi og regni, ikki vóru serliga góðar.

Gentur 14-15 ár

Jóhanna Súnadóttir Pedersen royndi seg í longdarlop í bólkinum G14-15 ár. Jóhanna er kvik, og hevur eitt gott avsett, men enn manglar hon at fáa næstsíðsta fetið at sita heilt, og tí leypur hon longd á sama hátt sum fyrsta avsett í trýstøkk, tvs hon kemur høg inn í avsettið, fær mestu ferðina við sær, men megnar ikki at fáa hædd á lopið. Hetta riggaði ikki á Tórsbreyt, men hon er blivin væl kvikari, og tí leyp hon væl longri í øllum lopunum, enn hon hevur gjørt áður. Tað longsta kom í triðja umfarið har hon leyp 4,21 m, sum er 30 centimetrar longri enn hon leyp í januar í ár. Hetta rakk til eitt annaðpláss í kappingini. Har er ongin ivi í, at lopini blív væl longri, tá hon fær teknikkin at sita. Eftir triðja lopið føldi hon eina byrjandi pínu í beininum, og tí var avtala at steðga, tí hetta kundi verði ein komandi skaði.

Jóhanna fór so til spjótkast, har hon saman við Kristinu Verlandsdóttir Hayfield skuldi royna seg við 500 g tungu spjótunum. Hvørgin venur hesa grein, men tað er stuttligt at síggja, hvussu langt grundleggjandi koordinatión røkkur. Jóhanna legði út við at kasta 13,13 m, meðan Kristina byrjaði við at bøta um sítt persónliga met við tveimum metrum til 16,77 m. Jóhanna kastaði eitt vet styttri í teimum báðum næstu kastunum, meðan Kristina legði enn ein metur omaná sítt persónliga met við at kasta 17,74 m í triðja (síðsta) umfarið. Tær gjørdust nummar eitt og tvey í kappingini.

Kristina endaði dagin á 800 m teininum. Eftir at rennistílurin er komin uppá pláss er fokus flutt yvir á ferð og úthaldni, har úthaldni hevur fylt væl meira síðstu vikurnar enn tað hevur gjørt áður. Hetta hevur givið Kristinu eitt yvirskot, sum sást frá tí at skotið fór, tí fyrstu 200 metrarnar fylgdi hon royndu rennarunum, men valdi so at lata teir fara, men helt tó gott tempo allan vegin. Úrslitið gjørdist at hon aftur bøtti um sítt persónliga met, hesaferð við gott 4 sekundum til 2 min 44,15 sek. Hon ognaði sær eitt annaðpláss í kappingini. Til stuttleikar kann nevnast at Kristina hevur bøtt um sítt persónliga met í hvørja tí einastu kapping á miðteini, hon hevur luttikið í.

Gentur 16-17 ár

Elin hevur vant støðugt í vetur. Her hevur fokus mest verði á tað tekniska, har hon hevur flutt seg munandi. Síðstu vikurnar er fokus tí flutt yvir á kraft og ferð. Hetta er nakað, sum ofta gongur útyvir tað tekniska aftur, men leygardagin skuldi tað standa sína roynd. Elin legði út við einum varligum kasti uppá 35,74 m, sum rakk til eitt pláss í talentbólkinum. So setti Elin ferð á, og har sást at kraftin er við at koma, tí hóast tað tekniska ikki riggaði, so endaði spjótið heilt úti á 39,38 m. Triðja kasti var meinlíkt, so var avtala at hon økti um atrenningina. Hetta darvaði eitt sindur í fjórða og fimta, men í sætta fekk hon atrenningina at sita, og aftur var kraftin stór, men avleveringin sat ikki, og tí bleiv flogið ov lágt. Úrslitið gjørdist tó, at Elin á fyrsta sinnið kom útum 40 m strikuna. Við einari optimalari avlevering eru nógvir metrar eftir at heinta. Elin vann kappingina trygt.

Dreingir 16-17 ár

Miso Buha byrjaði dagin við at renna 200 m. Her var hann so heppin at renna í sama riðli sum 18-19 ára gomlu dreingirnir og mennirnir. Miso hevur arbeitt nógv við at fáa loyst upp í rørslunum, og er hetta við at rigga í venjing, men kapping er nakað heilt annað. Hann var eisni í so læstur tá starturin fór, men hann fann leysara rennistílin, og fekk hála seg fram á eitt annaðpláss í riðlinum. Tíðin gjørdist 24,07 sek, sum er 0,23 sek skjótari enn hann hevur runnið teinin áður. Hetta var eisini næstskjótasta tíð á degnum, har bara vinnarin hjá monnum rann skjótari.

Miso, sum primert venur trýstøkk, royndi seg eisini í longdarlopi, har hann partvís hevur arbeitt við at seta fótin rætt í til næstsíðsta fet og so “bíða” á plankanum, heldur enn at smekka fótin niður á plankan. Hetta gongur spakuliga framá, men í kappingini var hann ov agressivur og tískil fekk hann eina góða hædd, men misti ov nógva ferð og harvið longd. Hann kom tó út á 5,52 m í triðja umfarið. Hetta var ein longd sum bara vinnararnir í eldru bólkunum (Dreingir 18-19 og menn) megnaðu at gera betur á degnum.

G18-10

Lýdia Poula Simonsen hevur við heiðursmerkjum á danska meistaraheitinum fyri ung í kúlustoyt verðuliga sett seg á hesa grein her heima, men hesaferð var spjótkast á skránni, sum ikki er tað henni dámar best. Hon byrjaði við einum miseydnaðum kasti men so kom ferð á, tí í øðrum kastaði hon 600 g tunga spjótið út á 19,74 m. Hon økti í fjórða umfari 20,42 m og í fimta til 22,82 m. Hetta tryggjaði henni eitt fyrstapláss í kappingini.

Kvinnur

Guðrið, sum eigur føroyska metið í hamarkast, royndi seg 600 g tunga spjótinum. Hon legði út við einum miseydnaðum kasti, men í øðrum umfarið kom hon út á 22,72 m. Hon økti til 22,84 m í triðja umfarið og síðan til 23,81 m í fimta umfarið, sum gjørdist hennara longsta. Hetta rakk til eitt annaðpláss í kappingini.

Menn

Fyrsta greinin hjá monnunum var 200 m har Tórur Mortensen og Dánjal Dahl Ljósheim høvdu melda til. Tórur eigur føroyska meti uttandura, og venjing hevur givið ábendingar um at hann er klárur at bøta um føroyska meti, men av tí at tað bara vóru 15 min millum startin á 200 m og startin í longdarlop, so mátti Tórur velja, hvat hann skuldi satsa uppá, og fall hetta val á longdarlop.

Dánjal venur mest 400 m og 800 m, men hann vísti í vetur at hann er skjótur við at taka føroyska metið innandura á 200 m teininum. Í sprint hevur Dánjal havt til vana at vera ov lágur tá hann kemur úr blokkinum. Hetta riggaði betur í dag, har hann kom avstað í rætta vinkli, og tískil fekk eitt munandi  betur drive fyrstu metrarnar enn hann er vanur við. Tá hann var komin upp í ferð er hann ikki til at steðga, og hann økti til allar hinar allan vegin á mál, har tíðin segði 23,33 sek, sum er neyvt 1 sek skjótari enn hann rann teinin í 2019 og bara 0,03 sek frá oyggjaleikakravinum.

Tórur, sum er við at koma upp í ferð eftir treiskan skaða, royndi seg í síni fyrstu longdarlop kapping í tvey ár. Longu í fyrsta lopið (video) sást at hann er við aftur, tí við at leypa 6,65 m kom hann langt útum oyggjaleikakravið, hóast hann var varðin í atrenningini og tískil ikki fekk nøktandi ferð við sær inn í lopið. Fokus var tí at leggja meir trýst á fyrstu fetini í atrenningini. Hetta gav meir ferð, og í triðja økti hann til 6,74 m, og í sætta umfarið kom hann so út á 6,90 m, sum nógv tað longsta lopið her heima í nógv ár, og bara er 20 centimetrar frá føroyska metinum.

Síðsti luttakari í eldin var Dánjal Dahl Ljósheim, sum skuldi royna seg á 800 m teininum. Dánjal hevur vant munandi fleiri kilometrar enn hann er vanur við í vetur, men enn manglar at fáa yvirsett hetta til special-úthaldni á 800 m. Hesum arbeiðir hann tó við, og sást tað tá hann legði út við at renna stabilt smá 30 sek pr 200 m fyrstu 600 m. So var orkan tíðanverri uppi, og misti hann nógv síðstu 200 m, sum hann rann uppá næstan 36 sek. Endaliga tíðin gjørdist 2 min 05,40 sek, sum er uml 2 sek skjótari enn hann hevur runnið teinin áður í Føroyum. Hann vann kappingina trygt.

Góð úrslit hjá yngru hvirlunum á Tórsbreyt

Annað umfar at stórkapping fyri børn og ung fór fram í regninum á Tórsbreyt leygardagin. Har var nakað av vindi og rættuliga nógv regn meðan kappast var, og darvaði hetta nakað, men ungu hvirlurnar vístu at tær bæði dáma og duga at kappast, tí øll fóru tey heim við persónligum metum.

U8 – Dreingir

Yngsta hvirlan hesaferð var Lui E. Olsen, sum fekk høvi at royna seg á 40  m teininum.  40 m er stytsti sprint teinur, og tí eitt gott stað at royna ferðina. Lui, sum rann á geil 2, var eisini skjótur avstað tá skotið fór, og kempaði væl allan vegin. Hetta sást aftur á tíðini, sum segði at hann rann teinin uppá 11,41 sek.

Gentur 8-9 ár

Helena í Skorini vísti á 40 m, sum var hennara fyrsta kapping á degnum, at hon er blivin væl skjótari enn hon hevur verið. Hon rann teinin meir enn ½ sek skjótari enn hon hevur gjørt áður, tá hon á geil 1 í riðili eitt rann teinin uppá 8,11 sek.

Helena helt beint áfram til longdarlop, har hon longu í fyrstu royndini legði 21 centimetrar omaná sítt besta. Hon økti við 4 sentimetrum í øðrum umfarið, fyri at leypa heila 2,73 m í triðja umfarið og tók harvið fyrsta plássið. Lopið var heilar 40 sentimetrar longri enn hon hevði lopið undan kappingini.

At Helena dugir at kappast sást aftur í kúlustoyt, tí aftur økti hon um longdina fyri hvørt umfar, tá hon byrjaði við at stoyta 2,0 kg tungu kúluna út á 3,00 m. Í øðrum umfarið kom hon út á 3,10 m og í triðja út á 3,55 m.

Dagurin endaði við miðteinarenning, og har var Helena aftur við. Hetta var hennara fyrsta kapping á 600 m teininum, men tað var ikki til at síggja, tí hon lá í tættari kapping við tríggjar aðrar allan vegin. Tíðin gjørdist so góð sum 2 min 37,72 sek.

Dreingir 8-9 ár

Kristjan Róksson og Eyðun E. Olsen byrjaðu dagin við at renna 40 m. Teir runnu lið um lið í fyrra riðili; Kristjan var á geil 3 og Eyðun á geil 4. Báðir spentu teir í, og báðir fingu teir góða løn fyri avrikið, tí við tíðini 7,62 sek rann Kristjan 0,32 sek skjótari enn hann hevur gjørt áður, meðan Eyðun við tíðini 8,21 sek rann 0,29 sek skjótari enn hann hevur gjørt áður. Ein flott framgongd hjá báðum!

Kristjan royndi seg eisini á 600 m, sum er 1½ umgangur á Tórsbreyt. Hetta var hansara fyrsta roynd á hesum teininum, men tað var ikki til at síggja, tí hann legði bragdliga fyri, og hóast ferðin fall eitt vet, so megnaði hann at halda hinar væl aftanfyri. Tíðin gjørdist so flott sum 2 min 12,88 sek.

Bæði Kristjan og Eyðun endaðu dagin við at leypa longdarlop. Kristjan legði hart út við at leypa 2,93 m, meðan fyrsta lopið hjá Eyðun miseydnaðist. Eyðun fekk tað at rigga betur í næsta og kom hann út á 2,53 m. Báðir royndu at koma longur út, men hesaferð komu teir ikki longri út. Teir 2,93 m hjá Kristjan er 23 centimetrar longri enn hann hevur lopið áður.

Gentur 10-11 ár

Hjá teimum 10-11 ára gomlu gentunum sóu vit á fyrsta sinnið Miu Ásadóttir royna seg í kapping. At byrja sína sprint-karrieru við 200 m er ikki sum at siga tað, men hon rann flott, tí eftir ein góðan start kempaði hon allan vegin, og á málinum segði klokkan at tað bara hevði tikið Miu 43,82 sek at renna teinin.

Dreingir 10-11 ár

Dánjal Olsen royndi seg á fyrsta sinnið í kapping. Her skuldi hann, eins og Mia, byrja sítt sprint við at renna 200 m. Hann legði hart út á geil 1, og kempaði væl. Tað var ikki til at síggja at hetta var debut, tí hann megnaði at renna teinin uppá bara 37,34 sek.

Í kúlustoyt, har Dánjal royndi seg við 2,0 kg tungu kúluni, miseydnaðist fyrsta royndin, men í næstu kom hann út á 4,50 m. Hann økti í triðja umfarið til 5,85 m, sum sostatt gjørdist tað endaliga úrsliti hjá honum.

Gentur 12-13 ár

Elena E. Olsen byrjaði dagin við at renna 200 m, har hon var á næst uttastu geil (geil 5). Hetta er teinur hon hevur runnið áður, og aftur í ár vísti hon stóra framgongd, tí eftir at hava lagt í so varliga út, kempaði hon seg fram síðstu 100 m, við tí úrslitið at hon rann teinin næstan 2 sek skjótari enn hon hevur gjørt áður. Tíðin gjørdist 34,77 sek.

So fór Elena til hæddarlop. Hetta er kapping har tað ikki hevur gingið heilt eftir vild áður, men tað var eyðsýnt at hon hevði avgjørt at nú skuldi tað verða. Hon var tó óheppin í fyrsta lopinum og gleið á hálu breytini. Hon kom tó sterkt aftur og leyp í øðrum umfarið uppum 90 cm. Á 95 og 100 cm tørvaði henni bara eina roynd at koma uppum. So fór yvirliggjarin upp á 105 cm. Her hevði hon onkra góða roynd, men yvirliggjarin datt, og tískil endaði Elena við at leypa 100 cm.

Eyðkenni tá Elena rennur miðtein er, at hon dugir sera væl at disponera orkuna. Hon leggur varliga út, og heldur so ferðina allan vegin. Hetta gjørdi hon aftur hesaferð, og har var ongin slingur í valsinum, tí við stabilu ferðini legði hon støðugt tær hon kappaðist ímóti, afturum seg. Á málinum segði tíðin 2 min 57,73 sek, sum er 12½ sek skjótari enn hon hevur runnið teinin áður.

Dreingir 12-13 ár

Aron Mikkelsen er við at gera kúlustoyt til sína grein, tí longu í fyrsta umfarið stoytti hann 3,00 kg tungu kúluna heilt út á 7,45 m, sum er 3½ m longur enn hann hevur stoytt hesa kúlu áður. Hann steðgaði tó ikki har, tí hann økti til 7,70 m í øðrum umfarið og heilt út á 8,20 m í triðja umfarið, sum merkti at hann ognaði sær eitt trygt fyrstapláss í kappingini.

Sprintararnir eru í toppform

Sprint er ein einkul ítróttargrein. Hetta merkir eisini venjingina, sum hevur fýra trin, har ein byrjar við trin 1, so verða trin 1 og 2 koyrd síðuleypandi. Tá tað er við at seta seg kemur trin 3 upp í, soleiðis at tey fyrstu trý trinini koyra saman áðrenn farið undir at venja trin 4. Trinini eru:

  1. lær at renna rætt
  2. lær at koma effektivt upp í ferð (acceleratión)
  3. fáa toppferðina upp
  4. lær at halda ferðina (sprintúthaldni).

Fyrsta umfarð av ársins grand prix kappingum á breyt, var eitt høvi at vita hvussu gongur við sprintvenjingini, har tey eldru eru komin upp til trin 4, tó við áhaldandi eygleiðing og um neyðugt justering av fyrru trinunum, meðan tey yngru enn arbeiða á lægru trinunum.Yngsti luttakarin hjá Hvirluni á 100 m teininum var Elena Ellindsdóttir Olsen, sum kappast í bólkinum gentur 12-13 ár. Elena, sum venur við ein av yngru liðunum í Hvirluni, rann seg fram til eina tíð uppá 17,33 sek, sum hóast ein mótvind uppá 3,2 m/s er 0,74 sek skjótari enn hon hevur runnið teinin áður.

Jóhanna Súnadóttir Pedersen (gentur 14-15 ár) arbeiðir enn við rennistíl og acceleratión. Har er hon við at koma hartil at toppferð verður tikin við í venjingina, meðan sprintúthaldni ikki er relevant enn. Serliga í startinum hevur Jóhanna eina stóra styrki, og var hon væl fremri enn hinar eftir fyrstu 10 metrarnar, men at hon ikki hevur vant sprintúthaldni merkti at munurin vantandi kom at minka. Jóhann er tó fightari, og helt á mál, har tíðin segði 14,34 sek (w: -0,3 m/s), sum er ein sera flott debut á hesum teininum.

Miso Buha (dreingir 16-17 ár) hevur í seinastuni nýtt nógva orku uppá at justera rørslumynstri í sprint, soleiðis at hann fær nýtt alla orkuna til at skapa ferð. Her kom veruligt hol á fyri stuttari tíð síðan, og síðan hevur venjing víst at ferðin er økt munandi. At fáa nakað so nýtt at rigga í kapping er ikki sum at siga tað. Miso var eisini ov uppspentur í byrjanini, og gleið aftur í gamla teknikkin, men fekk justera soleiðis, at hann kom upp at renna rættari móti endanum. Hóast hann rann nærum einasamallur allan vegin, so megnaði hann at renna teinin uppá 12,25 sek, sum bara er 0,08 sek frá hansara persónliga meti. Tað er ongin ivi um at hann er klárur at koma undir 12 sek.

Dánjal Dahl Ljósheim (menn), venur mest langsprint og miðtein, men fyri at optimera úrslit á longsta sprint teininum (400 m) er toppferðin avgerandi, og har er 100 m ein góð test. Í seinastuni er fokus hjá Dánjal flutt yvir á acceleratiónina og toppferðina, meðan specifikt sprintúthaldni enn ikki er í fokus. Dánjal kom væl avstað, og kom skjótt upp at renna, toppferðin er enn ikki heilt komin uppá pláss, men hann kom tó á mál bara 0,07 sek frá sínum persónliga metið hóast mótvindurin var 2,3 m/s. Eins og hjá Miso, so er ongin ivi um at Dánjal kemur undir 12 sek tá umstøðurnar at renna eru betur.Tórur Mortensen (menn), er leypari, men eigur eisini føroysku metini á 100 og 200 m. Hann hevur ein góðan sprint-teknik, og eina nøktandi toppferð í mun til tað at leypa, sum er tað primera. Av tí at hann ikki er sprintari, er ikki nógv orka nýtt uppá at optimera sprintúthaldni, men tó hava venjingartíðir títt uppá, at hann er klárur at renna skjótt. Tíðanverri gjørdi kuldin og mótvindurin (-2,3 m/s) at metið helt, men ein tíð uppá 11,48 sek, sum er meir enn ½ sek skjótari enn nakar annar megnaði á degnum vísur, at hann hevur fingið góðan basa í síni fyrireiking til lopvenjing.

At øll megna at renna upp til ella skjótari enn teirra besta í kuldanum og vindinum á Tórsbreyt í dag vísur at veturin hevur lagt ein botn, sum verður áhugaverdur at byggja uppá í summar.

Fleiri myndir her