Trygdarlop gav silvur, men kostaði sigurin

Tórur Mortensen var leingi roknaður fyri stór favorittur í trýstøkk, men 3 dagar áðrenn kappingin byrjaði kom maðurin, sum eigur oyggjaleikametið, eisini á startlistan. Hetta gjørdi at nú var dysturin um gullið rættuliga opin.

Tórur hevur verði darvaður av skaðum í vetur og vár, og tí hevur ikki verði gjørligt at leypa við fullum intensitetið. Í trýstøkk er timing í hvørjum av teimum trimum støkkunum avgerandi, og einasti máti at fáa fínpussa timingina er at venja við somu ferð og sama intensitetið sum í kapping. Hetta manglaði Tórur, men onnur venjing hevur gingið væl, og kropsliga er hann betur fyri enn nakrantíð. Spenningur var tí um timing og teknikkur fór at loyva Tóri at vísa hvussu væl hann er fyri.

Í fyrsta lopinum misti hann tempo inn móti plankanum, og tí rann hann ígjøgjøgnum, og fekk onki úrslit. Í øðrum lopið kom hann væl gjøgnum plankan, men í næsta støkkinum var hann eitt vet ov seinur við svingbeininum, og gjørdi tað at hann kom at hanga framyvir í næsta flognum. Tá lendir ein ov tungt, og í besta fall fær ein bjarga sær, men í ringasta fall, kann tað geva skaða at satsa tá ein lendir so tungt, og tí valdi Tórur ikki at satsa triðja støkk. Enn eitt lop uttan at fáa úrslit. So var trýst á Tórur, tí um tað triðja eisini miseydnaðist, so fór hann heim við ongum.

Í triðja lopinum valdi Tórur at taka eitt sokallað trygdarlop. Tað merkir at hann setti ferðina niður. Trupulleikin við slíkum lopum er at tá ferðin fer niður, so fylgir intensiteturin í einstaka støkkinum ofta við. So var eisini hesaferð. Tórur kom væl gjøgnum plankan, har minkaða ferðin í atrenningini gjørdi at hann leyp 30 cm aftanfyri plankan. Fyrsta støkki var gott, men tá hann skuldi seta av aðru ferð, gjørdi mangland intensiteturin, at hann var eitt vet ov seinur í næsta støkkinum. Tí tók hælurin fyrst. Triðja støkki vísti at bul-uppspenningin var ikki heilt har hon skuldi verða. Lopið bleiv mált til 14,49 m. So  við teimum 30 cm hann var frá plankanum, so var veruliga longdin uml 14,80 m. Tórur kom tó haltandi úr sandgryvjini, tí stoyturin tá hælurin tók í øðrum støkkinum hevði verði harður.

Lopið gjørdi at Tórur kundi halda áfram í kappingini. Í fjórða lopi sást tó hvussu harður stoyturin var, tí Tórur setti nærum ikki beini til í øðrum støkkinum. Avtala var tí at leypa fimta lop um, í vónini um at hann fekk tað at sita í síðsta lopið. Hann kom væl gjøgnum plankan, men aftur sást at hann var varðin við at seta fótin í.  Hvussu nógv skaðin verðuliga hevði darva sást tá Tórur skuldi heinta heiðursmerki:

Úrslitið gjørdist sostatt at Tórur, einasta góðkenda lopið var trygdarlopið í triðja umfarið. Tað rakk til eitt trygt silvurmerkið. At hann í verðuleikanum leyp 14,80 m, og harvið bara var 20 cm frá sínum føroyska metið við einum trygdarlopið, vísur at hann hevur kapacitetin til at leypa væl longri. So vónirnar um at klára 15,40 m, sum er kravið danska sersambandið fyri frælsa ítrótt hevur fyri luttøku á junior EM, hava bygt á realistiskar forvantningar. Hendan dagin var tað tó ikki so.

Samanumtikið væleydnaðir leikir hjá Hvirluni. Alda rann sínar tveir bestu 100 m nakrantíð. Nógvi mótvindurin var einasta orsøkin til at hon ikki setti met. Alda var eisini við á 4×100 m boðrenningini, sum bøtti um føroyska meti við góðum 1½ sekundi. Harumframt megnaði Margit Weihe Fríumundsdóttir (Bragdið), sum hevur verði við til tekniska lopvenjing fram móti leikunum, at leypa longsta longdarlop nakrantíð, og bøta munandi um føroyska metið í trýstøkk, har hon eisini ognaði sær broncumerkið.

Alda nummar 10 á Gotlandi

Hálvfinalur vóru á skránni mánamorgunin, og hendan morgunin var Alda einasti føroyingur í eldin. Hon skuldi royna seg á geil seks í seinnu hálvfinaluni á 100 m.

Alda var styrkismett til at enda sum nummar fimm í hesi hálvfinaluni. Alda kom sera væl úr blokkinum var væl við fyrstu metrarnar. So dragnaði eitt vet í mun til hana sum rann á geil fimm. Alda vildi tó ikki sleppa heilt, og tá hon kom á mál vísti tað seg at hon var enda sum nummar fýra í sterku hálvfinaluni.

Tíðin hjá Aldu gjørdist 13,63 sek, hóast vindmátarin segði 4,85 m/s ímóti. Standard korrektión fyri vindin sigur at ein mótvindur uppá 4,85 m/s kostar 0,7 sek á 100 m, so ongin ivi um at Alda rann upp til sítt allar besta og eitt sindur afturat í síni fyrstu kapping á oyggjaleikum. Í morgin er hon partur av 4×100 m boðrenningini, har hon skal renna fyrsta teinin.

Alda í hálvfinaluna á Gotlandi

Alda Sigurðsdóttir Lamhauge kláraði á fyrsta sinnið kravið til oyggjaleikirnar í vár, og tí hevur fyrireikingin í seinastuni snúð seg um at blíva klár, vitandi at støði er væl hægri enn í Føroyum. Alda hevur tó eina tilgongd til ítrótt og venjing sum røkkur langt, og tað vísti hon í dag, tá allar fyrsta skot var latið av á Gutavallen í Vísby á Gotlandi.

Alda var í fyrsta riðli, har hon skuldi renna á geil 4. Í mun til tilmelding, so átti Alda at enda langt aftast í riðlinum. Alda kom væl úr blokkinum, og hekk væl í hinum eftir fyrstu 20 metrarnar. Tá var hon komin í rætta sprintstílin, og har frá snúði tað seg um at kempa. Tað dugir Alda. Hon helt ferðini, og kom á mál sum nummar fýra við tíðini 13,58 sek. Hetta hóast ein mótvind uppá  2,06 m/s, sum eftir standard útrokningum hevur kosta henni uml. ¼ sekund í mun til um ongin vindur var. Sostatt leveraði Alda aftur hesaferð sítt allar besta tá tað veruliga taldi.

Eftir var so at bíða fyri at vita hvussu langt tað rakk. Møguleikin fyri finaluplássi tyktist tunnur, tí nr 1 og 2 komu beinleiðis í finaluna, og so komu fýra tær skjótastu tíðirnar av øllum hinum. Eftir Fyrsta riðil merkti tað at Alda í besta fall endaði á 10. av 12 finaluplássum. Næstu riðlarnir broyttu onki, og tí kom Alda í finaluna sum nr. 10!

Alda rennur semifinalu á bana seks í riðli tvey í morgin kl 10.25 føroyska tíð.

Úrslit frá triðja umfari av Grand Prix á breyt

Triðja umfar av grandi prix á breyt fyri børn, ung og vaksin var leygardagin 17. Juni. Treysti og roysnið stóðu fyri tí praktiska, og tað var stuttligt at síggja hvussu væl allar kappingargreinarnar vóru skipaðar. Einasta men var, at longdarlop og trýstøkk var í mótvindi. Tað ger at leyparar justera teknikkin á ein óhepnan máta, og læra sostatt feilir, umframt at lopini blíva óneyðuga stutt og harvið ómotiverandi.

Børn 7 ár og yngri

Rói Thomassen var aftur klárur, og hesaferð var bóltkast á skránni. Rói kastaði 11,45 m í fyrsta umfarið. Í øðrum kom hann heilt út á 13,16 m. Triðja kasti var eitt vet styttri, men ein flott kapping av ungu hvirluni.

Dreingir 10-11 ár

Rani Herjónsson Rubeksen og Ólavur av Steinum byrjaðu dagin við 80 m renning. Her vóru teir í sama riðli, og var tætt teirra millum. Ólavur, sum hevur roynt seg áður á Tórsbreyt, átti tó munin. Tíðin hjá Ólavur var 14,58 sek, meðan tíðin hjá Rana var 15,75 sek í hansara fyrstu kapping.

Rani og Ólavur royndu seg síðani í bóltkast. Her vístu báðir at teir duga at kappast, tí báðir kastaðu sítt longsta í síðsta umfarið. Ólavur byrjaði við at kasta 18,72 m, meðan Rani byrjaði á 14,12 m. Í øðrum økti Ólavur til 21,04 m, meðan næsta kasti hjá Rana miseydnaðist. Í triðja kom Ólavur heilt út á 26,15 m, sum er væl longri enn hann hevur kasta áður, og Rani kom heilt út á 17,40 m, sum er flott í hansara fyrstu kapping.

Eftir bóltkast var longarlop á skránni. Her royndi Aron Mikkelsen seg eisini. Aron leyp 2,51 m í fyrsta umfari. Í øðrum økti hann til 2,62 m, sum gjørdist hansara longsta á degnum. Ólavur byrjaði við at leypa 2,28 m. Hann økti í triðja til 2,38 m. Rani leyp 1,99 m í fyrsta umfarið, og hóast hann var nær við, so gjørdist tað fyrsta hansara longsta.

Gentur 12-13 ár

Børka byrjaði dagin við 80 m teininum. Hon fekk ein minni góðan start, men tað sæst at hon hevur vant væl, tí hon megnaði at kempa seg til eitt fyrstapláss við tíðini 11,85 sek, 0,02 sek frammanfyri nummar tvey. Børka ognaði sær eisini gullmerkið samanlagt.

Eftir 80 m var trýstøkk á skránni. Her var lopið móti nógva vindinum, men Børka er ikki so at steðga, tí hon megnaði at bøta um sítt persónliga met í øðrum umfarið har hon leyp 8,58 m, hóast ein mótvind uppá 5,5 m/s! Hetta rakk til eitt trygt fyrsta pláss, og eisini til eitt gullmerkið í samlaðu kappingini.

Triðja kappingin hjá Børku var 1000 m. Her legði hon varliga út, men tá 400 m vóru eftir setti hon ferð á og endaði við at vinna ein tryggan sigur við tíðini 3 min 43,34 sek. Samanlagt ognaði hon sær eisini gullmerki.

Børka endaði dagin við 400 g tunga spjótinum. Her tryggjaði hon sær sigur longu í fyrsta umfari við einum kasti uppá 22,42 m. Hon steðgaði tó ikki har, tí hon økti í bæði øðrum og triðja (síðsta) umfarið. Tað longsta gjørdist 25,12 m. Hon vann eisini grand prix kappingina í kast samanlagt.

Gentur 14-15 ár

Elin Niclasen byrjaði dagin við kúlustoyt. Hetta var hennara næsta kapping við 3,0 kg kúluni, men tann fyrsta uttandura. Hon hevur einans vant kúlu 2-3 ferðir í ár, men tað sást ikki, tí teknikkurin sat væl í dag. Fyrsta stoyti kom heilt út á 9,19 m, sum er útvið 1½ m longri enn hennara persónliga met. Næsta kom ein centimetur longri út. Tað triðja sat ikki heilt, men var tó lítlan metur longri enn gamla persónliga metið. Elin gjørdist nr 2 bæði í dagsins kapping og samanlagt í ársins grand prix.

Elin royndi seg eisini í longdarlopi, men her vildi tað ikki rigga hesaferð, men tað er ongin ivi um at hon eigur potentialið til eitt gott lop.

Gentur 16-17 ár

Sterku kastarnir royndu seg í kúlustoyti hesaferð. Lydia, sum hevur valt sær kúlustoyt, sum sína sergrein, vísti at her skalar ongin hana, tí longu í fyrsta umfarið stoytti hon 3 kg tungu kúluna heilt út á 11,20 m. Tvær ferðir afturat kom hon útum 11 m strikuna, men teir 11 frá fyrst umfarið gjørdist dagsins longsta. Tað er eisini persónligt met og bólkamet. Guðrið Káradóttir Petersen byrjaði varliga, men í fjórða umfarið sat teknikkurin, og lendi kúlan á 8,84 m, sum er nakað longri enn hennara gamla persónliga met. Sunniva Bogadóttir ognaði sær eisini eitt persónligt met. Tað var í fjórða umfarið, tó hon kom út á 8,48 m. Helena gjørdist nr 4 í dag við 7,40 m, sum hon stoytti í fyrsta umfarið. Í samlaðu kappingini vann Lydia frammanfyri Sunnivu við Helenu á triðja plássi. Her er vert at nevna at kappingargreinarnar sum hesir sterku kastarnir hava dystast í eru diskuskast (sergrein hjá Helenu), spjótkast (sergrein hjá Sunnivu) og kúlustoyt (sergrein hjá Lydiu), so kanska er tað ikki so løgi at Guðrið, sum hevur hamarkast sum sergrein, endaði á fjórða plássi samanlagt.

Dreingir 16-17 ár

Dánjal Dahl Ljósheim byrjaði dagin við longdarlop. Her byrjaði hann við at leypa 4,43 m. Í øðrum umfari økti hann til 4,58 m. Hetta gjørdist hansara longsta, og hóast mótvindurin var heilar 5,0 m/s, so var hann bara 7 cm frá sínum persónliga meti. Í samlaðu kappingini vann hann gull.

Onnur greinin hjá Dánjal var 400 m. Her sást at hann var troyttur, tí tíðin gjørdist 60,03 sek, sum er 3½ sek frá hansara persónliga metið. Hann vann tó kappingin, og eisini gull samanlagt. Bárður Jóhansson ognaði sær broncumerkið í samlaðu kappingini.

Dánjal fór síðan til kúlustoyt, har Bárður Jóhansson eisini royndi seg. Dánjal legði hart út, tí longu í fyrsta umfarið stoytti hann 5 kg kúluna næstan heilan metur longri enn hann hevur gjørt áður. Longdin gjørdist 9,55 m. Hóast fleiri góðar royndir, so kom hann ikki longri hesaferð. Bárður ognaði sær, eins og Dánjal, persónligt met í fyrsta umfarið. Hann steðgaði tó ikki har, tí hann bøtti um sítt met í bæði øðrum, triðja og fimta umfarið. Tað longsta gjørdist 7,75 m. Dánjal og Bárður gjørdust nr 2 og 3 ´kappingini og í samlaðu grand prix kappingini gjørdust teir nr 1 og 3.

Fleiri myndir eru í myndasavninum, og øll úrslit koma á fif.fo.

Úrslit frá øðrum umfari av Grand Prix á breyt

Annað umfar av Grand Prix fyri børn, ung og vaksin á breyt var á Tórsbreyt annan hvítusunnudag.  Niðanfyri er frágreiðing frá greinum har úrslit eru tøk.

Gentur og Dreingir -7 ár.

Hjá teimum yngstu var longdarlop á skránni hesaferð. Ró Apolonia Hansdóttir, Rói Thomassen og Sigrið Hansdóttir royndu seg. Ró, sum royndi seg á fyrsta sinnið í kapping á Tórsbreyt, leyp 1,85 m, meðan Rói, sum eisini royndi seg á fyrsta sinnið leyp 2,06 m. Sigrið leyp heilar 2,91 m, sum er 68 cm longri enn hon leyp í somu kapping í 2016.

Gentur 8-9 ár

Lív Neshamar byrjaði dagin á 60 m. Hon valdi, eins og síðst, at byrja standandi, og var tað eitt gott val, tí hon kom væl avstað. Hon kempaði væl allar 60 m, og kom á mál við tíðini 13,08 sek.

Gentur 12-13 ár

Kristina Verlandsdóttir Hayfield og Børka Berg Jørgensen byrjaðu dagin við Longdarlopi. Her leyp Børka 3,86 m í fyrsta umfarið. Í triðja økti hon til 3,91 m, sum var hennara longsta. Kristina, vísti at hon hevur tikið seg nógv fram, tí longu í fyrsta umfarið legði hon ¼ m omaná sítt persónliga met. Hon økti í øðrum, sum gjørdist hennara longsta. Tað bleiv mált til 3,37 m.

Børka og Kristina royndu seg síðan á 200 m teininum. Her var Børka tann skjótara úr blokkinum, men Kristina helt fast í Børku gjøgnum svingið, men so slapp Børka frá, og økti hon allan vegin á mál. Tíðin hjá Børku var 33,13 sek, sum er persónligt met. Tann eitt ár yngri Kristina kom á mál við flottu tíðini 37,45 sek.

Gentur 14-15 ár

Elin Niclasen byrjaði dagin við at renna 200 m. Elin, sum primert venur kast, vísti at hon dugir at renna, tí hon kom væl úr blokkinum, og var beinan vegin inni í effektiva sprint-stílinum. Tað var ringt at síggja, at hon ikki hevur vant nógva sprint, tí hon rann væl, og helt hinar allan vegin á mál. Tíðin hjá Elin er ikki tøk í løtuni.

Elin endaði dagin við at kasta 500 g tunga spjótið. Fyrsta kastið miseydnaðist, men hon valdi at halda fast fyri at koma á úrslita talvuna. Tað bleiv mált til 24,60 m. Í øðrum kasti var meir itensitetur, men tíanverri “misti” hon oddin av spjótinum, og kom tí at “hála niður í tað”. Hetta gjørdi at flogið ikki bleiv optimalt. Hóast hetta bleiv kasti mált til heilar 27,96 m. Triðja og síðsta kasti miseydnaðist.

Gentur 16-17 ár

Hjá 16-17 ára gomlu gentunum vóru tað teir fýra kastararnir sum umboðaðu Hvirluna, og væl var umboðanin, tí sjálvandi endaðu tær á teimum fremstu plássunum. Kappingin um annað til fjóra plássi gjørdist tó sera spennandi. Fyrsta plássi tryggjaði Sunniva Bogadóttir sær longu í fyrsta umfari við einum kasti omanfyri 34 m, sum m.a. røkkur til eitt annað pláss á danska styrkilistanum. Helena Svabo Ziska ognaði sær annað pláss við einum kasti uppá góðar 25 m, meðan Lydia Poula Simonsen og Guðrið Káradóttir Petersen báðar kastaðu millum 23 og 24 m, har Lydia var tann stinnara. Neyvu úrslitini eru ikki tøk.

Dreingir 16-17 ár

Dánjal Dahl Ljósheim og Tóki Bak Sørensen byrjaðu dagin við hæddarlopi. Hetta var fyrsta kapping í hæddarlopi fyri Tóka, men hann kom, eins og Dánjal, trygt uppum byrjunarhæddina 1,30 m. Tóki nýtti tvey lop fyri at koma uppum 1,35 m og 1,40 m. 1,45 m nýtti hann tó einans tað eina lopið at koma uppum. 1,50 m var tó ov nógv hesaferð. Harvið endaði hann aftanfyri Dánjal, sum kom uppum allar hæddirnar, íroknað 1,50 m í fyrstu royndini. Dánjal valdi at gevast á 1,50 m fyri at spara orku til 800 m.

Bárður og Dánjal vóru báðir á startinum tá skotið var fyri 200 m. Dánjal tó við eini ætlan um at taka tað róligt, fyri at spara kreftir til 800 m, sum var hálvan tíma seinni. Bárður, sum hevur vant væl í seinastuni, kom væl avstað, helt ferðina allan vegin á mál. Í mótvindi uppá 1,9 m/s gjørdist tíðin hjá honum 27,68 sek. Ætlanin hjá Dánjal var at renna uml 30 sek, og hann vísti at ferð-kenslan er við at verða har, tí tíðin hjá honum gjørdist 29,84 sek.

Í spjókasti vóru Bárður Jóhansson, Tóki og Dánjal við í tí, sum vísti seg at verða tættasta kapping á degnum. Tóki legði harðast út, tí í fyrsta umfari legði hann seg á odda við 27,20 m. Í øðrum umfari legði Bárður seg á annaðpláss við 26,37 m. Í triðja fór Dánjal framvið báðum tá hann kastaði 27,57 m. Hóast Bárður bøtti um sítt besta í fjórða umfarið til 26,94 m, so helt støðan sær kappingina út. Dánjal vann við 27,57 m (persónligt met við 2,5 m), Tóki gjørdist nr tvey við 27,20 m (persónligt met við 5 metrum) og Bárður gjørdist nummar trý við 26,94 m (persónligt met við 1½ m).

Dánjal endaði dagin við at renna 800 m. Hetta var tað, sum skuldi telja. Tíðanverri er smalt í toppinum á føroyskari miðteinarenning, tí noyddist Dánjal, effektivt sæð, at renna einasamallur. Málið var 2 min 5 sek. Teir fyrstu 200 m legði hann afturum uppá 30 sek. Næstu 200 m fór hann upp á 32 sek. Millum 400 og 600 m misti hann nakað, tí har nýtti hann 34 sek. Hóast hann gav tað hann hevði, so bleiv tíðin uppá teir 800 m 2 min 8,72 sek. Hetta er 4 sek skjótari enn hann hevur runnið teini úti áður og 7 sek skjótari enn hann rann teinin í somu kapping í 2016.

Gentur 18-19 ár

Alda Sigurðsdóttir Lamhauge, sum hevur knógva oyggjaleika kravinum á 100 m, skuldi hesaferð royna seg á 200 m. Alda, sum í seinastuni hevur arbeitt við startinum, kom væl úr blokkinum, men reisti seg ov skjótt, og misti tí nakað av “drive” á fyrstu metrunum. Tá hon kom upp í ferð royndi hon ov nógv og spenti tí upp. Hetta gjørdi at hon nýtti ov nógva orku. Hon misti tí nakað av ferð í mun til tað hon annars er før fyri, síðstu 50 m. Tíðin gjørdist tó 28,20 m, so har er nakað heilt specielt í væntu tá hon fær tað at sita.

Menn

Hjá monnunum var tað stak hugaligt at síggja Helga Geyti royna seg í spjótkasti eftir ein longri steðg. Tað var í spjótkasti hann royndi seg. Longu í fyrsta kasti vísti hann at hann enn dugir, tí tekniskt sá tað gott út! Fyrsta kasti bleiv mált til 35,06 m. Í triðja økti hanntil 35,83 m, men tað var í síðsta at hann vísti, at hann ikki bara dugir at kasta enn, men eisini eigur kappingar-psyku,tí tað var í síðsta umfarið hann kastaði sítt longsta kast. Tað bleiv mált til 36,54 m, sum rakk til eitt trygt fyrsta pláss.

Fleiri myndir eru í myndasavninum. Øll úrslit koma á www.fif.fo